Vawiin khan Chief Minister Pu Lal Thanhawla chuan a Cabinet Meeting Room-ah ramri chungchanga Mizoram Chief Secretary leh Assam Chief Secretary inbiakna huna tel tur Mizoram aiawh te chu thu pawimawh chhawpchhuahturte a enfiah pui .

March 20 khian Ministry of Home Affairs, New Delhi-ah Union Home Secretary kaihhruaina hnuaiah Mizoram Chief Secretary Pu Arvind Ray leh a team te chuan Assam Chief Secretary leh a team te nen ramri chungchangah state pahnih te aiawhin inkawmna an nei dawn a ni.

Vawiin chawhnu a inkawmhona pawimawh tak hi Chief Minister Pu Lal Thanhawla chuan a kaihruai a. Mizoram Sawrkar aiawhte chu an hnathawh a pawimawh tih chiang tur leh rilru fim tak pu chunga Mizoram sawrkar tan theihtawp chhuah turin a fuih a. He hunah hian sawrkar mi pawimawh – Land Revenue & Settlement leh Home Department te bakah Mizoram State Boundary Commission member te an tel a. State pahnih Chief Secretary te inbiakna a pharh tur Mizoram Sawrkar lehkha pawimawh leh Mizoram sawrkar tanchhan zawng zawngte chu a mal te te in uluk taka zirchian nawn leh vek a ni. Political Adviser to Chief Minister Pu Lalrinmawia Ralte bakah Chief Minister Office a Principal Secretary Pu Lalram Thanga leh Principal Adviser Pu RL Rinawma te pawh meeting-ah hian an tel a. Home Addl Secretary Pu Lalbiakzama leh Home OSD Pu David H.Lalthangliana ten Chief Secretary hi an zui dawn a ni.