Vawiin khan MIFCO Board of Directors meeting Vawi 84-na chu MIFCO Chairman Pu P.C. Zoram Sangliana, MLA hovin Commerce & Industry Conference Hall-ah an neih a ni.
He meeting-ah hian meeting hmasa a an thurel bawhzuina leh pawmna an neih bakah thurel pawimawh tak tak an nei a. Nikum 2017 chhung khan MIFCO chuan sapthei chingtute hnen atangin quintal 548.51 a lei sak a, a man pawh an pe tlak nghal vek a ni. NLUP-RKVY Scheme hnuaiah chhungkaw 610 laiin sapthei an ching mek a, MIFCO hi an thar chhuah leitu ber a ni.
Sorkar kum kal lai mek (Ni 1.4.2017-28.2.2018) chhungin MIFCO chuan Mizoram pawn lamah theitui cheng Nuai 30.34 man zet a hralh chhuak a. State chhunga a hralh te nen Cheng Nuai 46.37 a lei chhuak a ni.
MIFCO hmachhawp engemaw zat zinga Bung Bangla a Ran talhna chu chak taka kalpui mek a ni a, June thla tawpah chuan hman theih a hawn (commission) hman tura ruahman a ni. Hemi bakah hian Food Processing Plant, Sairang-ah kumin chhunga hawn (commission) hman turin Mineral Water Bottle siamna khawl bun turin chak takin hmalak mek a ni bawk.
MIFCO -in amah a Building a la neih loh avangin kum engemaw zat chu Pu Thanzauva Building, Dawrpui a luah thin a. Kumin 2018 January thla atang khan MIFCO Managing Director Pu J.Hmingthanmawia hmalakna-in Commerce & Industry Department, (Commerce Wing) Building, Peter Street, Khatla-ah an insawn a. Board of Directors meeting chuan lawm takin a pawmpui bawk a ni.
