Chief Minister Pu Lal Thanhawla chuan Bungkawn Pastor Bial Reformation & Camping Centre, Lawipu chu vawiin chawhnu khan a hawng.

Chief Minister chuan sakhaw hrang pathum zuitu te hual vel kara cheng Mizoram-a ringtute hi hnam dangte zinga rawngbawl turin Pathianin min dah a, Pathian chenchilh ram leh hnam kan nih miten an hriat theih nan hnam dangte thawhchhuah sa ring lova, mahni intodelh kan tum tur a ni, a ti. Sorkar chuan mahni chenna mual theuhah mipuite kan hlim a, kan intodelh theih nan hmasawnna hna chi hrang hrang a thawk a, a hlawhtlinna turin mipuiten rinawmna leh taihmakna nen kan chhunzawm tur a ni, Pu Lal Thanhawla chuan a ti a. Intodelh tur chuan taimak a pawimawh a, taima tur chuan hrisel a tul si avangin mihring taksa tichhetu leh nun titawitu ruih theih thil, zu leh drugs te bakah bawiha min siam thei zuk leh hmuam lakah kan fihlim a tul, a ti. Hetihlai hian bawiha tang laklawh tawh, mahni insiamtha thei tawhlo te tan leh thlarau lama tuihal te tana Reformation &Camping Centre Bungkawn Pastor Bial ten an siam chu lawmawm a ti a. An thahnemngaihna fakin Kristian te hi hun puma Pathian rawngbawl thei ni veklo mahila hun puma Kristian erawh kan ni thei tih hre thar leh tura chahin, Pathian min dahna hmun apiang hi a rawng kan bawlna tur a ni tih hria a, mahni dinhmun theuhah rinawm leh taimak chhuah zel turin Chief Minister Pu Lal Thanhawla chuan mipuite a sawm a ni.

Reformation & Camping Centre hawnna inkhawm hi Bungkawn Pastor Bial Chairman Upa Lalchawia’n a kaihruai a. Mizoram Synod Moderator Rev Lalramliana Pachuau chu khual zahawm niin thu a sawi a. R&CC Sub-Committee Secretary Upa K Zoliana’n report pe in Bialtu Pastor Rev TC Laltlanzova’n hunserh a hmang a ni.

Kum 2002 khan R &CC hmun tur bigha 25.79 a zau hi lei niin a theih ang anga sak tan a ni a. Ruihhlo leh thil dang avanga nun leh taksaa harsatna tawkte enkawl leh chhanchhuahna atana buatsaih a nih piah lamah a mamawh apiangte tana Camping neih nan hman tura ruahman a ni bawk.