National Seminar on Peace & Development in Mizoram : Challenges & Prospects tih Zoram Research Foundation leh Indian Council of Social Science Research - North Eastern Region leh Mizoram University te tangkawp in Aijal Cluba nimina an buatsaih, session hnuhnung ber, a kharna chu nimin tlai khan Chief Minister Pu Lal Thanhawla'n a hmanpui.

Chief Minister chuan hmasawnna tluantling awm tur chuan muanna a awm a pawimawh hmasa a ni a ti a. Sakhua lian zawng zawng hian muanna hi bulthutah an nei vek a, India politics kalphung leh hnamzia pawh hmangaihna, inunauna leh muannaah a innghat a ni a ti.Heti chung hian tharum thawhna awm thin, abikin India hmarchhak miten thil tum an neih, inchimral theihna laka hnam inhumhalh duh vangte, ngaihthah an nih avangte leh an danglam bikna hlutsak an hlawh loh avangte a silai leka tharum an thawh ta mai hi a pawi hle a ni a ti a. An thil vei te leh hluahthawnna an neihte chu a hriatthiam awm a, mahse silai leka tharumthawhna an hmang hi chu a pawm theih loh a ni a ti.

Muanna tello chuan hmasawnna a awm theilo a ni tiin, Pu Hawla chuan rambuai hre pha Mizo tawh phawt chuan hei hi an hrechiang hle a ni a ti a. Mautam vanga Mizo ten ei leh barah namen lova harsatna kan tawh kha sorkar khan min ngaihsak loh avangin buaina alo chhuah phah a ni a ti a. Hetiang inngaihsak lohna hi state thenkhatah a awm avangin Maoist ten buaina an chawhchhuah phah a ni a ti a. Chuvangin hmasawnna awm tur chuan muanna neih a tul rualin sorkar tha a awm a tul a ni a ti.

Mizoram chu kan vannei a, kohhran leh mithahnemngai ten nasa taka hma an lak avangin Remna leh Muanna kan neih thei a ni Chief Minister chuan a ti a.Venhimna lama mithiam te chuan khawvela ram buai, pen hmanga buaina tih tawp awm chhun a ni an ti chu a sawilang a. Muanna hlawhtling awm thei tur chuan a lehlam ve ve inpekna a tul a, sorkar hnathawk hotu lian inpeknate pawh a pawimawh tel a ni a ti.

Hmasawnna leh muanna tluantling nei thei tur hian sorkar tha a awm a ngaih thu sawiin, Chief Minister chuan tuna 12th Five Year Plan kan hman turah hian kan mamawhte dah pawimawh a, ruahmantu ah tel ve leh hmasawnna rah kan hmuh vek hi kan mamawh a ni a ti a.Hmarchhak mite hian duhthusam hraw tak kan neih hi a tul a ni tiin, Pu Hawla chuan India hmarchhak hi kum tam tak chhung chanchinbu ah a thalo lam, abikin silai leka sorkar do a lang hnem hle a ni a ti a.Chuvangin, mipui tan remchanna siam saka, thalaite tan eizawnna hmun hawn leh siam sak a tul a ni a ti.

Kharna inkhawmah hian Pu H.Liansailova, Finance Minister chu Khualzahawm niin Remna Ni denchhena Hmasawnna leh Muanna lam hawi Seminar buatsaih ani chu a inhmahin a lawmawm hle a ni a ti.

Inkhawm hi Pu Denghnuna, IAS (Rtd) in a kaihruai a ni.