Parliamentary Secretary Pu KS Thanga'n vawiin khan  Venghnuai Multi Farming Co-operative Society Ltd., Aizawl te buatsaih thingphun hawnna programme a hmanpui.  

Pu KS Thanga chuan mihring nun nena nghet taka inkungkaih tlat thing leh mau, ram ngaw te enkawl a vawn nachang ram neituten kan hriatloh avangin nasa takin ram ngaw kan ti chereu a, Mizoram dung leh vangah ramngaw chhah tha hmuh tur mumal a awm tawh manglo a ni, a ti a. Ramngaw neihthat a pawimawhzia hriain sorkarin thingphun kawngah hma a la, Forest Department leh Department dangte kaltlangin thingphun hna a thawk mek a, chutihlaia hetiang kawnga thahnem ngaihna chang hria, mi vengva ten pawl lian tak an lo din chu thlamuanthlak a tih thu leh fakawm a tih thu a sawi a. Ram awmsa humhalh piah lamah awm tura siam nachang kan hriat phawt chuan Mizoram hi ram nuamah kan siam thei a, a nachang kan hriat loh erawh chuan Mizoram hi reiloteah thlalerah kan siam thei a ni,a ti bawk. Pu KS Thanga chuan Venghnuai Multi Farming Co-operative Society Ltd. thingphunna hun an buatsaih chu fakin an tu leh fate zel thlenga in zirtir chhunzawm turin a ngen a ni.

Thingphun hawnna programme hi Venghnuai Multi Farming Co-operative Society Ltd. Chairman Pu V. Lalzamvela'n a kaihruai a. Hawnna programme zawh veleh hian Mualpui kawn intanna atanga Zotui Lui (Society Link Road) inkarah  Ngiau, Thlado (Chawnpui) leh Khuangthli  engemawzat an phun a ni.