Vawiin chawhnu khan Chief Minister's Conference Hall-ah rikrum thila tangkai, chhanchhuah hna thawktute androids hmang smartphones a biakpawhna tur, Aizawl DDMA App changtlung zawk chu a mamawhtute hman theih turin Chief Minister Pu Lal Thanhawla'n a tlangzarh a. 

Hemi hnu hian rikrum thila koh theih,Chhanchhuahna lirthei,  Damdawi leh chhanchhuahhna thawhna hmanraw chikim a thuam, Emergency Response Vehicle(ERV) pawh a vailiam nghal a ni.

Chief Minister Pu Lal Thanhawla chuan, "Mizoram chu lirnghing thlen theihna hmun hlauhawm zual, leimin leh tuilian vanga harsatna a lo thlen fo na a nih avangin a chhunga chengte kan inralrin bik a ngai a. Tunlai thiamna hmang tangkai a Mizoram mipui mobile phone hmangtu nuai sawm chuang zet ten an tangkaipui tur Aizawl DDMA App siam a ni chu a lawmawm tak zet",  a ti a. He apps hi a lo tangkai zawk nan  Mizoram mipui mobile nei zawng zawng ten an phone ah an dah a; hman a tul hunah a hmandan te an lo bel vek a tul thu a sawi a. 

Chhiatrupna thlen theihna hmunah Mizoram chu a awm a vangin sawrkar pawh in awmze nei zawk in a hun leh hmun in a phut anga hmalakna kalpui a nih theih nan theihtawpin hma a la mek a. Chhiattawkte,  in leh lo chante pawh in tanpuina an dawn theih nan Central team te hmuh theih tura thlalak leh video te lo neih lawk a nih theih nan  District Bawrhsap te pawh hriattir an ni tawh a ti.

ADDMA App siam a nih dan leh hman tangkai a nih theih dan te Aizawl Bawrhsap Pu Kannan Gopinathan chuan powerpoint hmangin a sawi fiah a. ADDMA App hi Androids hmang Smartphone neitu te tan Google Playstore-ah lutin Aizawl DDMA tih chhutluh a download hnuah install theih a ni.  ADDMA App-ah hian  My Zonal Officer tih hmeh in chhiattawk leh tanpui ngai te tan an awmna bial(Zone) viltu, Officer Incharge te phone hmangin a biak nghal theih a, midang harsatna tawkte chanchin/dinhmun pawh a thlen theih a. Request Relief Material chhawmdawlna hmanruate a dil theih a, Notification-ah chahchin pawimawh - khawchin, kawng dinhmun, etc te a dawn theih a. Report Incident-ah thuneitute hriattur thilthleng a thehluh theih a. Important Contact-ah phone number biakpawh tur pawimawh zual dah a ni a. Resource Mapping-ah mahni awmna bul hnai ber a hmun pawimawh- police station, hospitals, Fire & Emergengy, etc., te a awm a. Rescue Me-ah tanpui dilna a thawn theih a; Call DEOC-ah DM&R district Official te biak pawh theih niin Dos & Donts-ah inkaihhruaina leh hriattur pawimawh te hmuh tur a awm a ni.

Emergency Response Vehicle (ERV) hi Powergrid in Corporate Social Responsibility(CSR) kaltlanga sum cheng nuai 20 a thawh hmangin Aizawl Bawrhsap Office in an lei leh chhanchhuahna hmanraw chikim a an tih phuisui lehchhawn a ni.

ADDMA App tlangzarhna hun hi Pu John LT Sanga, Addl. DC & CEO, ADDMA in a kaihruai a. He hunah hian DM&R Commisioner & Secretary Pu Zothankhuma, Pu Lalfanliana, ICT Sectretary leh Pu Zosangliana, Jt Director, DM&R, CYMa hotute leh Powergrid hotuten thu an sawi a ni.