Vawiin chawhma khan DC Conference Hall, Lunglei-ah Special Summary Revision of Electoral Roll September thla chhunga neih tur atana inbuatsaihna kal zelah Lunglei District Level Standing Committee-te chu Lunglei SDO(S) leh DC charge la mektu Pu H. Lalrinpuia hovin an thukhawm.

Vawiin meeting-ah hian Lunglei District huamchhunga Polling Station hawnthar chungchang, Polling Station Building thlak chungchang leh Polling Station tih tawp chungchang te rel ho a ni a. Committee chuan Thangpui, Bualte leh Bolia khua ah te Polling Station hawng thar turin hmalak ni se tih a rel a. Polling Station atana hman mek, a Building tha tawk lo, Building tha zawka sawn chungchang Committee chuan a ngaihtuah bawk a. Lunglawn, Sethlun, Thingsai-II, Kanghmun ‘S’, Zote ‘S’, Tuikawi leh Rolui khua ah te Polling Station hmunhma tha zawk leh panna nuam zawk ah thlak ni se tih Committee chuan a rel. Meeting kaihruaitu Pu H. Lalrinpuia chuan September thla chhunga Electoral Roll Revision neih tur chungchang sawiin sawrkar hnathawk, tlawmngai pawl  leh political party hrang hrang aiawh kalkhawmte chu Lunglei District chhunga  Roll thianghlim leh dik tak nei turin an theihtawp chhuah theuh turin a sawm.

Lunglei Election Officer Pu James Lalnithanga pawhin thu sawiin Roll Revision kalpui kawnga Sawrkarin tih dan thar a neih EROnet chungchang a sawifiah a, hemi hmang hian mipuiten internet hmangin Voter ID thar emaw Voter Card tihdanglam an dil thei dawn a ni. September ni 15-ah Draft Electoral Roll tarchhuak turin hmalak mek a nih thu kalkhawmte a hrilh bawk.

Vawiin meeting-ah hian sawrkar official te bakah tlawmngai pawl hrang hrang aiawhte leh party hrang hrang aiawhte an tel a ni. 

Attachment

  • Loading attachment...