National Health Mission, National Institute of Biologicals (Noida), State Blood Cell (Mizoram) leh Aizawl Voluntary Blood Donation tangkawpa buatsaih ‘Two Day Workshop on Strengthening of Blood Services & Haemovigilance’ chu vawiin khan Assembly House Annexe Conference Hall-ah Health Minister Pu Lal Thanzara-in a hawng.

Hawnna inkhawm Mission Director, NHM Mizoram Dr.Lalrozama kaihhruaiah Khuallian Pu Lal Thanzara chuan Mizoramah Blood Services chungchanga inzirtirna Workshop hmasa ber buatsaihtu leh bultumtute chungah Mizoram sorkar aiawhin lawmthu a hrilh a, sorkar laipuia Ministry of Health & Family Welfare-in Mizoram-a National Health Mission hnathawh tichak lehzual tura sum leh tanpuina hrang hrang a pek thin chuan rah tha a nei zel a ni, a ti a. Kum 2017-2018 atana Mizorama NHM Programme Implementation Plan atana sum dil pawh Health Ministry-in a rawn phalsak tawh avangin lawmthu a sawi bawk. Vanneihthlak takin Mizoram district tinah Blood Bank din tawh niin Mizoram sorkar hmalaknain Blood Bank 2 dang - State Referral Hospital, Falkawn leh Mizoram State Cancer Institute, Zemabawk-ah te hawn belh tum thu leh Lunglei-ah Blood Component Separation Unit pawh hawn tum a nih thu a tarlang bawk. Mizoram mipui zingah ui lo leh engmah beisei let lova midangte nunna chhanhim tura mahni thisen pe thin zawng zawng chungah Minister chuan lawmthu sawiin blood donor engemawzat Workshop-ah an rawn tel ve thei chu a lawmawm hle a ni, a ti. Khuallian hian Blood Cell, NHM atanga Blood Collection & Transportation Van dawn thar chu a hawng nghal bawk a ni.

Ministry of Health & Family Welfare atanga lo kal National Consultant & Coordinator, Blood Cell, NHM Pi Vinita Srivastava pawhin thu sawiin ramchhunga blood donation leh blood bank te kalpui dan leh dinhmun chungchang a sawi a. Sorkar laipui chuan Mizoram chhungah blood services tihchangtlun a tum zel a, a mamawh mipuite tan awlsam zawka banphaka dah sak hi NHM hnuaia an hmalakna chuan a tum ber a ni, a ti. Mihring hriselna leh damlote enkawlna kawngah thisen hi thil mamawh leh pawimawh ber pakhat a nih avangin blood donation chungchanga dan fel tak Drugs & Cosmetics Act, 1940 hnuaiah duan a ni nghe nghe tih a sawi. Rampumah Blood Bank 270 hawn a ni tawh a, Blood Van 120 state-te hnenah  semchhuah a ni bawk a, henga damlote thisen mamawh zaa 60% chu an chhungte leh volunteer-te pek khawm a ni a. Tun hnai khan The Hindu chanchinbu chuan fimkhur tawk lohna avangin thisen inpek atanga HIV/AIDS kaichhawng mi 2234 an ni angin a tarlang a. A tak takah chuan hei aia tam daih thisen inpek atanga HIV/AIDS kai an awm rin vangin sorkar chuan a mamawhte hnenah thisen thianghlim chauh pekchhuah a nih theih nan blood screening chu ngaih pawimawh berte zingah a nei a, NHM kaltlangin Blood Bank leh Blood Storage tam zawk, changtlung leh thianghlim tak siam a tum a ni, a ti bawk.

NHM State Nodal Officer, State Blood Cell & NCD Dr.Eric Zomawia chuan Mizoram-a Blood Services bultan leh than zel dan sawiin kum 2016-2017 chhung khan donor atangin thisen unit 25895 hmu a ni a, zaa 83.27% a ni tih a tarlang a. Mizoramah Blood Storage Centre 12 sak tawh ni mahse sum harsatna leh khawl chhiat avangin 3 chiah hnathawk theia a awm mek laiin sorkar laipuiin NHM kaltlanga Blood Services tihchangtlun a tum tak zar zovin tunah hian Centre khar tawhte chu thuamthat tum a ni, a ti. Blood Services tihhmasawn nan Health Minister Pu Lal Thanzara thahnemngaihna leh ngenna avangin Mizoram MLA zawng zawngten an MLA Fund atangin cheng nuai 1 theuh an thawhkhawm chuan nasa takin a tanpui thu a sawi bawk. Tunah hian sorkar laipui chuan ramchhungah e-blood banking ‘E-Rakht Kosh’ bultan a tum mek a, Mizoram atang pawhin blood bank lama thawk doctor leh technician 30-in training an zo tawh tih a sawi a. Mizorama blood donors mipa zingah Lalremruata chuan 65 units pein a sang ber a, hmeichhia-ah Rebecca Saimawii chu 53 units pein a pe tam ber thung tih a tarlang a ni.

Mizoramah damlo thisen pek (blood transfusion) hmasak ber chu kum 1973 khan niin kum 1993-94 khan Aizawl-ah Blood Bank hmasa ber hawn a ni a. Kum 1997-ah Blood Bank 5 - Aizawl, Lunglei, Champhai, Durtlang leh Serkawn - ah te hawn niin kum 2007 khan Mizoram District 8-ah Blood Bank hawnna tur licence pek vek an ni. Association for Voluntary Blood Donation (AVBD) chu Aizawl-ah kum 1991 khan din tan niin, kum 2001-ah Lunglei leh Champhai-ah branch hawn a ni a, kum 2010 khan District zawng zawngah AVBD din a ni zui ta a ni. A tirah chuan blood bank atanga damlote thisen pek chu man nei lo ni thin mahse hun kal zelah blood bankte tih changtlun a ngaih leh mamawhna a san zel avangin tunah hian nominal charge Rs.500/- chawi tir an ni.