Vawiin chawhma dar 10:30 khan Assamese kum thar kut Rongali Bihu chu Assam Cultural Society (ACS) buatsaihin Vanapa Hall-ah hman a ni a. Chief Minister Pu Lal Thanhawla chu Khuallian niin, a nupui Pi Lal Riliani’n a tawiawm a ni.

Pu Lal Thanhawla chuan Assam Cultural Society te’n an kum thar kut lawmnaa Khualliana an sawm chu lawmawm a tih thu sawiin, kal khawmte chu kum tha tak hmang turin duhsakna a hlan a. India ram, a bikin hmarchhak state-te hian hnam ziarang inang lo tak tak kan nei a; chu’ng zingah chuan Assam hnam ziarang chu hausa leh huap zau ber a ni tiin, hmarchhak state dangte paw’n u anga kan en leh min phuar khawmtu ber a nih thu a sawi a. He’ng kan hnam ziarangte hi inzahsak tawnin inpumkhatna tha kan siam a tul a ni, a ti.

International Space Station thlenga ken lo ni tawh Assamese hnam puan ‘gamosa’ Guwahati-a an dah that mek chu hnam tan ro hlu tak a ni tiin, Chief Minister chuan hmarchhak zawng zawng ai awh a nih avangin tha taka vawn ni zel se a duh thu a sawi a. Mizoram chu tun hmaa Assam sawrkar hnuaia awm reng thin a nih avangin, Assam nen pawh inzawmna thuk tak a nei a ni tiin, chu inlaichinna chu inunauna tha tak nen vawn him zui zel a pawimawh thu a sawi bawk.

ACS hnenah hian Chief Minister chuan tanpuina leh lawm thu sawi nan Rs 1,50,000/- (nuaikhat leh singnga) a hlan a. Chief Minister te nupa hi ACS chuan an hnam thil – gamosa (puan), sarai (dar), japi (lukhum) leh rimawi hmanrua (sutuli leh gagana) te an hlan ve bawk.

Rongali Bihu hi Assamese kum thar kut niin, kum 2004 atang khan ASC huaihawtin Aizawlah hian kum tin hman a la ni a. Hmarchhak hnam hrang hrangte huap kim thei turin hnam hrang hrang zai leh lam entir a ni thin a. Mizorama Assamese awmte leh hnam dangte pawh an kal tha thei hle a ni.