Vawiin chawhma dar 10:30 khan Gan Sabra leh François-Xavier Bagnoud Foundation (FXB), Positive Women Network of Mizoram (PWNM) leh Blue Heaven Academy te tangkawp buatsaih World AIDS Orphans Day chu I&PR Auditorium-ah hman a ni a. Health & Family Welfare Minister Pu Lal Thanzara chu khuallian niin, a nupui Pi Zohmingthangi Sailo-in a tawiawm a ni.

Pu Lal Thanzara chuan fahrah nih hrim hrim hi a rapthlakin, AIDS avanga nu leh pa nei lo naupangte an khawngaihthlak lehzual a.  Nu leh pa nei lo natna vei zui naupangte an vanduaiin an khawngaihthlak tak zet a ni, a ti a. India ramah HIV/ AIDS vei tam ber dawttu nihna kan chelh hi a chhuanawm loh hle tiin, sawrkar leh MSACS anga do hneh chi a ni lo, a ti bawk. Drugs vang aiin mipat-hmeichhiat hman khawlohna vangin he natna hi a darh nasa hle tih sawiin, kohhran leh tlawmngai pawlte’n ralpui phiara kan phiar loh chuan tun atanga kum 5-ah chuan a tai darh nasa tawh hle dawn a ni, a ti bawk.

Health Minister chuan MLA-te inpekna avangin HIV/ AIDS veite’n an dinhmun an hriat chian nan cheng nuai 18.5 man CD4 Count Machine an chah thlen thu sawiin, STI Drugs, syringe leh condom lei tawhte chu hmun hrang hranga hman tura thawn chhuah mek a nih thu a sawi bawk. Gan Sabra, FXB, PWNM, Blue Heaven Academy leh pawl dang tam tak sum leh pai neih sa nei lova an inpekna hi kan vannei tak zet a ni, a ti a. Naupangte chu beiseina nung nei chunga hma la zel turin duhsakna a hlan nghal a ni.

Aizawl Bishop Most Reverend Stephen Rotluanga CSC chuan tawngtainain he programme hi a hawng a. Pi Lalruatfeli Pachuau (PWNM), Pi Christina Lalrindiki (FXB), Pi C. Laldingliani (Gan Sabra) leh Pi Rebecca Saimawii (Ambassador for Children Living with HIV) te’n thu an sawi a. Pi Lucy Maruati’n lawm thu sawiin he hun hi a khar a ni.

World AIDS Orphans Day hi kum 2002 atang khan hman tan lo niin, Mizoramah pawh kum 2004 atang khan kum tin May ni 7-ah hman thin a ni a. Kumin thupui atan ‘Raise your voice’ tih thlan a ni.