694/2025-2026

Aizawl the 1st June 2025: Vawiin tlai lam khan Chief Minister Pu Lalduhoma chuan CM Conference Hall-ah fur ruahtui tam tham tak lo thlengin Mizorama chhiatna a thlen mek te sawihona meeting a ko va. Minister leh official pawimawh te bakah district bawrhsap ten video conference hmangin an zawm.

Meeting hian, hmun hrang hranga chhanchhuahna hna thawktute, khualzin tangkhang duat taka lo tanpuia, eitur leh riahna lo ngaihtuahsaktute zawng zawng chungah lawmthu sawiin, zo nun ze mawi lantir a, tanpui ngaite lo tanpui zel turin a ngen a ni.

District capital te inkalpawhna leh Airport kawng ngaih pawimawh hmasak ni se, DDMA ten chak taka hna an thawh zel theih nan a rang lama fund pek chhuah zel ni se, chhawmdawlna (relief fund) pawh a ranglama pek chhuah zel ni se, an ti. Chhiatna thlenna hmun umzuina lam chu DM & R ngaichang chunga kalpui zel ni se, central sawrkarah harsatna hrang hrang te report fel fai taka thehluh thuai ni se, an ti bawk. Chhiatna thleng tam tak hi mihring siam (man made) atanga lo intan nia a lan thin avangin, he mi kawngah hian khauh leh zuala kal tha an tih thu sawi lan a ni a, chhanchhuahna lam thiam neih tam deuh deuh a tul thu sawi a ni bawk.

DM & R lamin report an dawn chinah hmun 211 ah leimin a awm a, in chim 60 a awm a, in rauhsan 69 a awm a, road block 83, retaining wall chim 4, electric ban tlu 1, lei tlahniam 2 leh mitthi 4 an awm. Tui lian report pawh a awm nual. Chhiatna thleng report hi meeting lai ngei pawh hian a la awm belh a ni.

PWD enkawl kawng hi hmun 21 ah a block mek a, Serchhip, Thenzawl leh Sialsuk vela khualzin tangkhangte chhuah theihna turin chak taka hna thawh mek a ni. 

Power & Electricity report dan in 33 KV Sub Station hi pasarih  (7) a chhia a, Mizoram pumpui hmun thuma thena hmun khat aia tam mahin harsatna an tawk mek. A siam that hna hi thawh reng a ni a, khua a that chuan ni hnih thum chhunga an siam vek theih an inbeisei.

PHE report dawn chinah hmun 50 velah chhiatna report an dawng a. Kolasib tui pump khawl, Keitumah Solar Pump khawl leh Hnahthial pump te chu tuilianin a chim a. Line chhia hmun enge maw zatah a awm.

Supply department lam chuan Monsoon Stock an nei zo fel hman a, engmah harsatna a thleng lo turah an ngai.

Deputy Commissioner ten an district dinhmun report an pe bawk.

Heng report te hi meeting neih laia an report dawn chin zel a ni.

Meetingah hian Pu K. Sapdanga, Home Minister, Pu Vanlalhlana, PWD Minister, Prof. Lalnilawma, DM & R Minister, Pu F. Rodingliana, P&E Minister te bakah sawrkar official pawimawh tak tak te an tel a ni.