693/2025-2026

Lunglei, 2025 Nikir thla ni 1: May ni 30, 2025 aṭanga thlipui leh ruahpui thawk chuan Lunglei District chhung hmun hrang hrangah chhiatna a thlen belh zel a. Vawiin, June ni 1, 2025 (Pathianni) chawhnu dar 1:00 thleng khan Lunglei District Emergency Operation Centre (DEOC)/District Disaster Management Authority (DDMA) chuan chhiatna thleng report hrang hrang 66 a dawng tawh a. Lei min vanga chhiatna hmun 50 chuangah thlengin, thli vanga chhiatna hmun 8-ah leh tui lian vanga harsatna hmun 5-ah a thleng a. He'ng chhiatna hrang hrang hian khaw kar leh khaw chhung inkal pawhna tam tak tipingin, a theih ang angin then fai hna thawh nghal zel a ni a. An chenna in dinhmun hlauhawma a din avangin hriat theih chinah chhungkaw 36 chu hmun him zawkah an inthiar chhuak tawh bawk. He'ng chhiatna avang hian mihring thi leh hliam erawh an awm hriat a ni lo.

Nimin lam khan Rahsivengah Revenue Department ram minin a hnuaia kawng hnawhin, then fai hna thawh nghal a ni a. Phairuangkai lei helna (diversion road) chu tui lianin tichhiain, kal tlang theih a ni lo va. Khawmawiah Ngengpui lui leh Kawrawng lui lianin, chhungkaw 40/50 vel thlai a tichhia tih report dawn a ni a. NH-302 Hauruang leh Pachang inkar kawngpui khi leh tla hniam awmin, bal mai hlauhawmin a awm bawk a. Nimin lama Bunghmuna lei min vangin chhungkaw 5 chu an chenna in aṭangin hmun him lamah an inthiar chhuak a, Bunghmun thlanmual minah thlan 18 a chhia tih report dawn a ni bawk.

Tuichawngah tui lianin an in a chim avangin chhungkaw pahnih chu RMSA School-ah awm lailawktir niin, Tlabungah pawh Khawthlangtuipui lian vangin chhungkaw pariat (member 33) chu hmun himah an inthiar chhuak bawk.

Tukin khan Serkawn - Zohnuai peng, Sianglinga Filling Station bulah lei min leh chirh tawlhin waiting shed hnawlin, kawng a hnawh a. PWD te'n then fai hna thawk nghalin, zing aṭanga lirthei a tlan tlang theih loh reng hnuah chhunlai vel khan tihtlang leh tawh a ni a. Nizan lama Theiriat kawng chung balin kawng hnuai NH-54A kawng hnawhin, kawng then fai hna hi thawh mek a ni a. Theiriatah hian lei min leh khi avangin chhungkaw 4 chu an chenna in aṭangin hmun himah an inthiar chhuak bawk.

Vawiin khan Kawlhawkah lei min vangin chhungkaw 3 an chenna in aṭangin hmun him zawkah an inthiar chhuak a. Changpuiah thliin chenna in pakhat leh anganwadi centre pakhat nuai chhiain, Mauzamah thliin chenna in pakhat a nuai chhe bawk a. Bungtlang West-ah thli vangin chhungkaw 3 an chenna in aṭangin hmun him zawkah an inthiar chhuak bawk.

India Meteorological Department (IMD)-in khaw chin a thlir lawknaah Mizoramah June ni 1 - ni 3, 2025 chhungin ruah nasa tak la sur chhunzawm tura a lan avangin Lunglei DDMA thuneitute chuan District mipuite fimkhur tur leh loh theih loh thilah lo chuan zin chhuak rih lo turin an chah a. Chhiatna leh harsatna thlengte a rang thei ang berin mahni bialtu Zonal Officer hnenah emaw, District Emergency Operation Centre-ah emaw hriattir ṭhin turin an chah bawk. DEOC hi eng tik lai pawhin he’ng number-ahte hian biak pawh theih reng a ni: Landline – 0372-2323635; Toll Free No – 1077