Vawiin chawhma khan Tuikhuahtlanga Central YMA Hall kawtah CYMA hnuaia Central Anti Drugs Squad (CADS) te man, ruihhlo Rs.1.58 Crore chuang man Chief Minister Pu Lal Thanhawla’n a hal ral.

Ruihhlo hal ral hmaa inkhawm tawite buatsaihah Chief Minister chuan YMA hi India a NGO te zinga tha ber pawl anih thu a sawi a. CADS ten hetiang zah ruihhlo an man chu lawmawm a tih thu sawiin, airporta man thin te pawh theih anga chhui mek zel a ni a ti. Mizoram hian pawnlam atangin kawng hrang hranga run mek leh rawk mek kan ni tiin, ruihhlo leh thil thalo tam tak rawn titute hi nek chep an nih theihna tura hma latu CADS chu fakawm a tih thu a sawi a. YMA chu sorkar kutke pawimawh tak a ni, a ti. Pu Lal Thanhawla chuan Mizorama mihring nuai 11 vel atanga nuai hnih vel, pawn lam mi te hian leilung fate thawh peih loh an thawk reng a, hetiang renga kan kal chuan nakin lawkah mahni ram chhung ngeiah pawn lam mite hnuaiah kan kun mai ang tih a hlauhawm a ni, a ti a. Chuvangin a ram neitu, a leilung fate hi than harha, kan taihmak angai a, keimahni ram ngeiah nek chepa kan awm lohna turin hnung lama mit nei anga kan kal a tul a ni a ti.

Chief Minister chuan YMA nena thawh hona tha tak a awm thu a sawi bawk a ni. Chief Minister hian a tula hman atan CYMA President Pu T.Sangkunga hnenah Rs.50,000/- a hlan a ni.

Excise Minister Pu JH Rothuama pawhin thusawina a nei bawk a. A tula CADS in a hman atan Excise Department angin CYMA hnenah Rs.1 lakh a hlan bawk a ni.

Vawiina ruihhlo hal ral tak ni 13.4 2012 leh ni 9.4.2013 inkara chhunga CADS in an man te a ni a. Hal ral takte hi No.4 (Heroin) hawng 20 leh a chanve, 586 cane, 232 piece te, Parvon/Proxyvon 139476 capsules, Nitrosun/ Alphrozolam 3275 tablets, Opium 2 Kgs, Damdawi kheh chi 125 Kgs, 1612500 tablets te an ni a, avaia man hlut zawng chu Rs.1,58,62,358.00 a ni.