Chief Minister Pu Lal Thanhawla chuan vawiin khan Administrative Training Institute (ATI) Auditorium ah ni hnih chhung awh tur 'Training on ND&PS Act, MLTP Act, ADC Act  for NGOs, Judicial Magistrate, Police and Excise & Narcotics Personnel" a hawng.

Hawnna inkhawmah Chief Minister chuan ruihhlo zuartu leh tawlhrutu man te chu na taka hrem theih dan a awm em tih zirchiang turin hetiang training buatsaih hi Council of Ministers thukhawm ina alo rel tawh tih puitlinna a nih thu a sawi a. Ruihhlo zuar mante hi reilo te chauh an tan thin avangin, na tak leh rei tak tan tir dan a awmlo anih chuan Mizo dan ang, inpeizawna tlangchil mai te hi a hman theih mai lo'm ni a ti a.An ni hi hnam hmelma,setana hmanrua an ni a, ngilneihna an mamawh lo a ti.

Pu Hawla chuan drugs ngawlveite hi misual an ni hranpa lova, damlo natna khirh tak vei an nih avangin enkawl ngai an ni a ti. Chuvangin man hmasak an ni thin chu pawi a tih thu a sawi a. CYMA in a ngawl veite Pathian thu nen enkawlna an siam hi tha a tih rualin, a beitham hle a ni a ti a. A enkawlna hmun Sethawn ami hi a sak dan bul thut a dik loh avangin siam that phawt a hman tangkai tum a ni a ti. Chief Minister chuan ruihhlo in thalaite atih buai loh nan skill development lam kalpui a tum thu a sawi a. Ngawlveite enkawl tawh, a enkawl chhunzawm zel dan pawh ngaihtuah a pawimawh thu a sawi bawk.

Chief Minister chuan mi thahnemngai tena an mi man te an tang reilo lutuk thin hian an phurna a tithuanawp ang tih an hlauh avangin chipchiar zawka dan zira, kim hlel (loopholes)te a awm em tihte zir tura training hi buatsaih anih bawk thu a sawi nawn a ni.

Chawhma khan Pu Vanlalena, Chief Judicial Magistrate, Aizawl in Assam Drugs (Control) Act (ADC Act), 1950 chungchang a sawi a, chawhnu lamah Pu K.L.Liana, Special Judge in Narcotic Drugs & Psychotropic Substances (ND&PS) Act chungchang a sawi bawk a ni.