Chhingchhipa Sainik School tur hmalak tan mek chu vawiin khan Chief Minister Pu Lal Thanhawla’n a hmunah a tlawh a. Sainik School dah hi Chhingchhip khaw mipuite duhsak vang nilovin an inpekna avanga dah anih thu a sawi.

Chhingchhip khawtlangin an khuaa Sainik School dah lawmna vantlang inkhawm Vankeu Kawn hmuna an buatsaihah Pu Lal Thanhawla chuan Chhingchhip mipuiten neitu rilru pua chhuan kal lehzel turte tana an inpekna hi a ropui a, hmathlir thui tak nei chunga phut let compensation beisei miah lova ram an pe hi an fakawm a, Mizoram khua zawng zawngin an inpekna ropui tak hi entawn se a duh thu a sawi a ni.

Chief Minister chuan Sainik School chhuakte hi sipai officer-ah kher lo pawh hnasang dang tam takah luh a awlsam bik a, khua leh tui tha ni turin tam tak a chherchhuak thei a ni, a ti.Chief Minister chuan hetia Chhingchhipa Sainik School a lo awm dawn ta chu Mizoram rampawn atangin mi tam tak tlawhtu an awm dawn a, chumite tana thlenna tur Tourist Lodge pawh sak turin hmalak a ni ang a ti.

Sainik School atana ram petu zawng zawngte hi chhungkaw 44 an ni a, a kalkawng tur approach road pawh chhungkaw 17 zetin an pe bawk a. School awmna hmun tur Rihte Ram hi Hectare 100 chuanga zau a ni a, a sakna tur zawng zawng hi Rs.100.33 crores (NLCPR atangin 50.33 crores leh 13th Finance Commission atangin 50 crores) a ni a tunah hian Rs. 1985.59 lakh sanction tawh a ni a, tunah hian approach road tur chu a formation cutting zawh a niin a school hmun tur te, administrative block awmna tur te, khelmual te, hostel leh school building hmun tur atan hmalak mek a ni. He hna thawktu hi Prasad & Co., (Project Works), Ltd. a ni a, a hmunah an awmchilh nghal a ni.

Vantlang inkhawm neihna ah hian Chhingchhip V/C in CM Relief Fund atan Rs. 3000/- Chief Minister hnenah hian an hlan bawk a. Chief Minister hi a nupui Pi Lal Riliani bakah bialtu MLA Pu K. Lianzuala, Chairman, KVI Board, Serchhip DC Pi Juhi Mukherjee IAS leh Sainik Welfare & Resettlement ten an tawiawm a ni.