Vawiin tlai dar 2 khan National Seminar on Mizo Drama and Theatre chu I & PR Auditorium, Aizawl-ah kharna neih a ni a. He hun hi Pu P.C. Lalrinpuia, Secretary, Zoppen Club-in a kaihruai a, Seminar sponsor-tu, Central Institute of Indian Languages aiawha lo tel Prof. Kedutso Kapfo chu khuallian a ni.

Kharna Inkhawmah hian Bharat Adivasi Drama Award-2012 mi 3, Pi Khawlkungi, Pu Lalthangfala Sailo leh Prof. Laltluangliana Khiangte te hnenah khuallian hian a hlan a. Award dawngtute kawmna hun hi hman nghal a ni. Anni 3 hi Padma Shri Award dawng tawh vek an ni. He Award hian Rs 5,000.00 a keng tel.

Hmingliani Drama Party, Mission Vengthlang chuan Drama hmuhnawm tak ‘Ka Phatsan Lovang che’ tih an entir a, Prof. Laltluangliana Khiangte, Director, National Seminar on Mizo Drama & Theatre chuan Valedictory Adress a sawi.

Chawhma lamah Seminar Paper chhiarna hun hman a ni a, he hun hi Prof. RL Thanmawia, MZU leh TC Jonunsanga, Secretary, Jt. Hqrs. MAL, Lunglei ten an kaihruai a, heng mite hian Seminar paper an chhiar: Zoramdinthara, Asst Prof. PUC, Lalzarzova, Asst Prof. Govt. HBC, K. Lalnunhlima, Asst. Prof. MZU, Lalropuia, Research Scholar, MZU, Ruth Lalremruati, Asst. Prof., MZU leh Lalnunpuia Renthlei, Research Scholar, MZU.