Ram pum rualin vawiin khan National Press Day 2012 chu Mizoram-ah pawh hman a ni ve a; he Ni hmanna hi vawiin khan Mizoram Journalists’ Association (MJA) General Headquarters leh Directorate of Information & Public Relations tangkawpte chuan Aizawl Press Club-ah an buatsaih a. National Press Day 2012 hmanaah hian Information & Public Relations (I & PR) Secretary Pi M. Zohmingthangi, IAS chu khuallian niin programme hi I & PR Director Pu Jim K. Chozah a kaihruai a ni.

Pi M. Zohmingthangi chuan media mite kalkhawm chu media khawvel ah hian zir tur an nei belh zel tih hre renga mipui rawngbawlna hna kalpui turin a ngen a. Programme-ah hian Pu K. L. Rochama, President, Former Legislators Association of Mizoram (FLAM) chuan ‘Freedom of Media towards Communal Harmony’ tih thupui hmangin Paper a present-a. Thupui sawihona leh sawizauna hun Pu Lalsiama Fabawl, Deputy Director, I & PR kaihruai ah hian chanchinbu mi leh thuthar lakhawmtu engemawzat chuan thu sawiin hemi lamah mipui zirtir uar tul a ngaih thu leh Communal Harmony hawizawnga thil tih a tul thu te an sawi lang a ni.

National Press Day hmanaah hian MJA hruaitute leh Member te hi an kim hle a. I & PR Department officer te pawh engemaw zat an tel bawk a ni.