Chief Minister Pu Lal Thanhawla chuan nimin khan Saitualah, Mizorama a hmasaber tur Tribal Girls’ Hostel sakna tur lawmna inkhawm, Govt. Higher Secondary Schoola buatsaih chu a hmanpui.

Chief Minister chuan Tribal Hmeichhe Hostel kan neih tur hi Saitual tan chauh nilo, Mizoram tan hmasawnna rahbi thar a ni a, a lawmawm hle a ni a ti a. Sorkar chuan kan zavaia that tlanna tur a ngaihtuah hmasa thin a ni tiin, hostel neih turah Saitual khua leh a chhehvel mipui ten lawmna chang an hria chu thil lawmawm tak a ni a ti. District headquarter ni tura sorkar hmasain alo puan tawh, tipuitling tura an ngenna chu Chief Minister chuan, ‘tlan chhe chung leh fuke awm miah lovin districtah an puang che u a, district headquarter ni tur hian a fuke tam tak la buatsaih a ngai a, chu chu bialtu in a ngaihtuah chho mek a ni’ a ti.

Chief Minister chuan kan hnathawhna apiang hi, politics ani emaw, sorkar hna ani emaw, kuthnathawhna ani emaw Pathianin a rawngbawl tura min dahna a ni tih hriain tui taka thawh hi kan tih tur a ni a ti a.A chhelai siam thatu tur vek kan a ni a ti. Sorkar flagship programme NLUP chu uluk tak leh ngawrh taka kal chhohpui zel anih thu sawiin, a sum hi eng package pawh nise, setana package anih loh chuan a tawk a ni a ti a. A dawngtute an lawm chuan sorkar pawh alawm a ti. Sorkar ang chuan an hlawhtlin tawh thu sawiin, Pu Hawla chuan a hlawhtlinna ziktluak chu a dawngtu rinawmna, taimakna leh dikna ah a innghat a ni a ti.

Tunlai hi thalaite khawvel a ni tiin, Chief Minister chuan thalaite tana khawvel thar siamna turah education chu a bulthut pawimawh hmasa a ni tih hriain, Education Reforms Commission din ani a ti a. A taka hmang turin inbuatsaihna a kal mek a ni a ti. Thalaite tana infiamna lamah pawh chak taka kalpui mek zel a nih thu sawiin, zirna sang zawk NIT, IIMC kan neih tawhte bakah Management lamah te hmalak mek ani a ti. Civil service leh sipai lama tam zawk an luh theih nan hmalak anih thu a sawilang bawk. Hlemhlet leh eirukna chungchangah Chief Minister chuan eirukna zung chu phawi tawh a ni a, phoro tur chuan hun ala ngai a ni a ti a. Vawiin thlenga a sorkar chu hlemhletna lama sawisel tur a awmlo chu a lawmawm hle a ni a ti.

Khualzahawm bialtu MLA Pu R.Lalzirliana, Home Minister chuan Mizorama la awm ngailo, a hmasa ber tur Saitual-ah Tribal Hmeichhe Hostel sak a ni dawn hi a lawmawm tak meuh a ni a ti. Pu Zira chuan a bial chhunga hmasawnna hna thawh tawh leh thawh mekte a sawilang bawk a ni.

Hostel sak tur hi Union Ministry of Tribal Affairs hnuaia ‘Centrally Sponsored Scheme of Hostel for Scheduled Tribe Girls and Boys’ atanga sak tur, naupang 100 awm theihna tur a ni a, a senso tur hi Rs. 388.79 lakhs a ni a, Central Sorkar tum vek tur (100%) a ni. A sak hna hi Mizoram Sorkar Social Welfare Department leh North East Consultancy Services ten an enkawl anga, a satu tur contractor chu Royte Developers Pvt Ltd. ani ang. Hetih rual hian he scheme hnuai atang tho hian Pachhunga University College leh KM HSS, Aizawl a hostel sakna tur Rs.759.86 lakhs pawh sanction hmuh tawh a ni bawk.

Inkhawm hi Social Welfare Minister of State Pu P.C.Lalthanliana’n a kaihruai a, Pu Chawngtinthanga, Parliamentary Secretary leh Pi B. Sairengpuii, Secretary, Social Welfare Department te an tel bawk a ni.

Inkhawmah hian Saitual Group YMA leh Joint YMA ten Chief Minister relief fund atan Rs.3000/- leh Rs.2000/- CM Pu Lal Thanhawla hnenah an hlan bawk a ni.