Nimin 1.6.12 (Zirtawpni) khan Parliamentary Secretary Pu S. Laldingliana chuan a bial chhung Tawipui South ah YMA Tawipui Group Conference vawi 22-na kharna hun chu Khuallian niin a hmanpui.

YMA Tawipui Group Conference hi May ni 31 atanga neih tan niin, he hunah hian Group huam chhunga Branch 12 atangin palai mi 194 an kal a. May ni 31 kha thlenkimni niin nimin a tiak chu Khuallian Programme leh Variety Cum Cultural Programme a hun hman a ni thung. Nimina Conference inkhawm hi Pu C. Lalrinchhana, President, Group YMA in a kaihhruai a. Pu JK Chanchinmawia, Assistant Secretary Group YMA chuan hunserh hmangin he Conference hmanpuitu Pu Lalhmangaihzuala, President, Lunglei Sub. Hqrs YMA leh Khualzahawm Pu H.Chhuanawma (E.M. LADC. Lawngtlai) te pawhin fuihna thu tha tak tak an sawi bawk a ni.

He Conference a thusawiin Pu S.Laldingliana chuan YMA chu tanpui ngaite tanpui tu pawl ropui, midangte tana malsawmna thlentu a ni a, he nunzia hi kan chhawm nun zel a ngai a ni tiin \" Kan thupui anga Ram Leh Hnam Humhalhna kawnga ke kan pen rual hian zirna hmanga tan kan lak a ngai a, dinhmun tha leh duhawm zawkte hnam dangin min chan khalh ta fo mai a, chuvangin zirna kawngah hian Keini chhim lam mipuite hian nasa lehzuala tan kan lak a ngai a ni. Zoramin hmasawnna hrang hrang kan hmachhawn chho mek zel a, hengte hi hmachhawn thiam tura kan inpeih a ngai a ni\" a ti. Khuallian chuan \"Kan ram rohlu thing leh mau chereu zelte hi venghim tura nasa taka tan kan lak angai a, theihtawp chhuahin ke i pen tlang zel ang u\" a ti bawk.

He hunah hian Group huamchhunga zaithiam hrang hrangte zai ngaihthlak a nih bakah naupang ten Hnam lam mawi tak tak an entir bawk a ni. Tawipui Group huam chhungah hian Branch 12 a awm a, member mi 2303 an awm bawk a ni. He Conference a kal Paliate hian hruaitu tur hetiang hian an thlang : President : C. Zohlimpuia, Tawipui S. Branch;  Vice President : C. Zosangliana, Mualcheng South; Secretary : Joseph Lalhlimpuia, Tawipui South; Asst. secy. : K.Vanlalsiamkim, Minpui Branch; Treasure : Lalluna, Thualtu; Fin. secy. : F. Lalhnehzova, Tawipui North-I te an ni.

Pu S. Laldingliana hi Lunglei Hospital atangin Dr. Lalhriatpuia leh Lunglei AMFU President bakah Party hruaitu engemaw zatin an tawiawm a ni.