Aizawl chhimlam 13 kms-a hla a awm, Hlimen khaw piah chiah a Samtlang khua in vawiin khan an khaw kum za tlin lawmna a khawnawtin an community hall-ah an hmang a, Chief Minister Pu Lal Thanhawla chuan kum za tlin hriatrengna lungphun hawngin a hmanpui.

Chief Minister chuan Samtlang khua in hei leh chen Pathian kaihhruaina an dawng chu lawmthu sawi tur an ni, a ti a. Khawchhete tih leh Vawkzawn tia hriat thin anih laia a tlawh tawh thin thu a sawi a. Khaw taima tia mi hriat hlawh tak an nihna pawh Pathian thu anga rim taka thawka, beka thlan tui luang chunga hna an thawh thin vang a ni, a ti a. Ringtu kan nih chuan kan taima hle tur a ni tiin, Pu Hawla chuan khaw khata mi awm thei deuh chu mi taima chhungkua an ni deuh zel a ni, a ti. NLUP pawh taimakna, rinawmna, dikna leh Pathian tih chunga thawk tura tih an ni, a ti.

Mizote hi kristian za a za, Pathian hnam thlan inti ngam kan nih chuan ei leh barah te, sum leh paiah te kan intodelh tur a ni a, hnam hrisel ber ni tur kan ni, Pu Lal Thanhawla chuan a ti a. Amaherawhchu, thla hnih daih pawh thawk chhuak zo lo, cancer ngah ber hnam kan ni hi a chhuanawm loh a, tan kan lak hle angai a ni, a ti a. Chuvangin hnam changkang leh hrisel, hnam intodelh nih hi ringtute chuan kan tum ber tur a ni, a ti. Pathianin NLUP hmang hian Mizote hi min chhan chhuah a tum a ni tiin, a hlawhchham chuan Mizote leh sorkar a mualpho mai lo anga, ringlotute mit hmuhah Lal Isua hmel kan ti bal ang tih a hlauhawm a ni, a ti. NLUP chuan khawvel mamawh a funkim a ni tih mithiamte pawhin an hria a ni, a ti a. A hlawhtlin chuan a dawngtute an dingchhuak mai niloin, ramngaw kan nei leh anga, kan lui hnarte a tha leh ang a, sik leh sa a siam tha bawk ang a, kan ram hi a siam tha dawn a ni, a ti.

Samtlang khaw mi tam takin ar vulh hna bera an nei chu tha a tihpui rualin, Chief Minister chuan kan ran vulhte nen kan inchiahpiah lutuk chuan kan hriselnain a tuar thei a ni tih hre turin khaw mi te chu a chah a. Heng hna atang hian Aizawl khawpui chawmtu tur an la nih theih avangin leh hmasawn zel tur an nih bawk avangin Pu Hawla chuan hmathlir thiam tak nei chunga an kal chhoh chu an duhsak ber a ni, a ti.

Khaulzahawm, bialtu MLA Pu K.S.Thanga, Parliamentary Secretary chuan a bial Aizawl South III a khaw 26 awm zingah Samtlang chu khaw taima ber, remhriatna hmang thiam, an khua a len loh chhuta zirna lama hmasawn ber, Aizawl kurtaia chawm thin khua, tunah chuan ar vulh nasa ber khua ni ta hi chanchin chhe zawnga sawi tur awmlo hian kum za an tling hi an lawmpui awm tak zet a ni, a ti.

Pu K.S.Thanga hian kum za tlin hriatrengna souvenir a tlangzarh nghal a ni.

Samtlang hian kum za an tlin lawmna hi nimin atang khan an hmang tawh a, zanin pawh hian a lawmna anla kalpui zel dawn a ni. Kum za tlin denchhen hian mi 43 in a thlawnin thisen an pe a ni. A khawnawtin vawiin khan ruai an theh a, kum za tlin lawmna atana sum an hmuh zawng zawng chu Rs.3,16,706.00 a ni. Samtlang khuaah hian mihring 800 vel an awm a, chenna in 168 a awm bawk a ni. Kumin 2013 atang hian tui thianghlim tlan tur Aizawl Greater Water Supply Scheme Phase II atang pek an ni.

Vawiina lawmna inkhawm hi Pu F.Lalengliana, Monument Sub-Committee Chairman in a kaihruai a ni.