Mizoram kartin chhuak chanchinbu Lelte-in kum sawmthum a tlin lawmna chu vawiin chhun dar 12:00 khan Aizawl Press Club-ah lawmna hun hman a ni a. Education Minister Pu Lalsawta chu khuallian niin, Pu Lal Dingliana, IFS (Rtd), Chief Information Commissioner Mizoram, MJA President Pu C.Lalrambuatsaiha, Information Director Pu Jim K. Chozah leh a thawhpuite leh PIB hotupa Pu Mangjangam Tauthang te’n an hmanpui a ni.

Pu Lalsawta chuan, Lelte Weekly-in Mizorama-ah Zofate tana hmalakna hi a ropui hle a, Lelte hi lo awm ta lo nise, Mizo zaithiamte hian eng kawng nge an zawh ang tih a ngaihtuah fo thin thu a sawi a. Kum 30 zet khel lova Lelte chhuak thei ta chu an Editor Pu C.Dinthanga leh a thawhpuite in pekna vang a ni tiin, chanchinbu enkawl hautak tak kum 30 chhung zet mar tha taka an enkawl thei chu ropui a tih bakah hnam hian a zar kan zo nasa a ni a ti.

Pu Sawta hi Lelte Editor hian Chawimawina Citation hlanin, Mizoram-a rimawi lama sulsutu hmasa leh zaithiam lar hmasaten a hla phuahte avanga an lo lar avangte leh Minister a nih hnua Education Department hneh taka policy leh zirna kaphung thar a ruahman avanga Mizoram tan hmasawnna lo lang ta chu lawmawm tiin chawimawina thuziak hi a hlan a ni.

Inkhawm hi Pu K.Sapdanga, Editor Vanglaini-in kaihruaiin Lelte neitu Pu C.Dinthanga’n report a pe a. 1983 June ni 10 atanga vawiin ni thlenga an chanchinbu a kal theihna chhan chu Pathian leh Sawrkar leh Mizo mipui ten thlawpna vang a ni a ti. Aizawl chanchinbumi, zaithiam lar leh mihriat hlawh tak tak ten Lelte kum 30 lawmna hi an telpui a ni.