Vawiin chawhma dar 10:30 khan Lunglei DC’s Coference hall ah Clean Lunglei Committee member te chu an chairman Pu Joseph Lalhimpuia, Vice Chairman HPC Lunglei leh Lunglei Bawrhsap Pu V.Sapchhunga hovin Lunglei khawpui lo thianghlim zawkna tur relin an thu khawm a. Meeting-ah hian Sub-Committee on Clean Lunglei chuan Faina leh Thianghlimna zirtir na kawnga Lunglei mipuite leh sawrkar te finchhuahna tur kawng hrang hrang an ruahman te bawhzui dan tur kawng dap atan pharh a ni a. Clean Lunglei volunteers committee pawhin Clean Lunglei awareness campaign an neih dan tur ruahman na an siam te leh Clean Lunglei campaign tan hun tur a ruahmanna an siam te an chhawp chhuak bawk a. He Clean Lunglei Campaign atan hian zaithiam Pensy B.Lalthlengliani leh Bethsy Lalrinsangi bakah football pet thiam Lalrindika Ralte (Didika) te chu Ambassador atan an ruat a ni.

Pu Joseph Lalhimpuia, Vice chairman HPC Lunglei chuan faina leh thianghlimna chu mitin tan insengso vak lova kan tih theuh theih a ni a. Hriselna leh nun nawmna anih piah lamah khawpui timawitu leh ram hmelhmang ti zahawmtu a ni, a ti a. Ram mipui ten hma kan sawn tial tial a, faina leh thianghlimna pawimawhna pawh kan hre viau tawh na in, tan kan lak nasat erawh a la ngai hle a ni, a ti. He kan hmalakna hi kan Chief Minister pawhin min phurpui a a bul tan nan Ayush kaltlangin cheng nuai khat min ruahman fel sak tawh a ni, a ti.

Sub-Committee Clean Lunglei Committee in ruahmanna a siam tawh point 10 chhawp chhuah chu sawi zau anih hnu ah pawm vek a ni a. Kawng 3 dang ruahmanna siam belh pawh tha tih a pawm leh vek a ni. Hmalakna tur chhawpchhuah zingah hian sawrkar thuneitu te hnena tawiawm tura ngenna te bakah YMA leh VC te kaltlanga khawtlang mimal hnena ngenna te a awm a, a bik in khawpui chhunga vawk vulh leh mihring tana natna tihdam theihloh Ui-a seh (Rabbies) thlen thei tu Ui vulh khuahkhirh a nih theih nan a vantlang mipui te inhrilh hriat bakah khuahkhirh theitu sawrkar a thlen te an rel a ni.