1784/2026-2027

Lengpui the 14th August 2026: Vawiin khan Chief Minister Pu Lalduhoma chuan Lengpui Vengtharah Dr. Lalrokhawmate chhungkaw din Samuel Lifecare & Cosmetics Private Limited Company a hawng. He company hian kum thum chhung zirbingna (Research & Development) a kalpui hnuah tunah hian Cosmetic chi hrang hrang 46, Home Care products chi 9 leh Food Supplement chi 2 an siam chhuakin an hralh chhuak tan tawh a ni.

A hawnna inkhawmah thu sawiin Chief Minister chuan, Samuel Lifecare & Cosmetics Private Limited kan hawng hi Mizoram tan mai ni lovin, India hmarchhak tan hun chhinchhiahtlak a tlingin ka hria. An products zawng zawng hi anmahni zirbingna atanga formula an hmuhchhuah behchhan veka an siam a ni a, Cosmetics lamah phei chuan India hmarchhaka a hmasaber leh a awm chhun a nih hmel a. Mizoram leh India hmarchhak tan mellung thar an phun tihna a ni.

Mizoramah leh state dangah pawh Industry leh factory hi an awm thliah thluah a, a tam zawk chuan midangte thil hmuhchhuah, midangte khawl hmanga siamna hmun an din tlangpui a. Chutiang hmun atang chuan sumdawnna rilru pu taka engkim kalpui a ngai thin.

Mizoramah hian kum tin Consumer Goods lamah cheng tam tak kan hmang ral thin a, Cosmetics-ah ringawt pawh hian kan seng tam ngawt ang. Chung zawng zawng chu state pawn leh ram pawn atanga kan lakluh an ni a. Kan pawisa thawhchhuah ve te hi kan ramah rei tak cham lovin state pawnah an chhuak zung zung thin. Kan ram ngeia kan mamawh thilte siam ve theih hi kan economy chawikan nana tihmakmawh a ni a. Kan ram siamchhuah hi state dangah zuar ve sup sup tawh zawk se tih hi kan duhthusam a ni.

Chuvang chuan, kan han sorkar phat atang khan hetiang lama hmasawn dan hi kan ngaihven nghal a, kan Flagship Scheme- Handholding pawh hian a tum ber chu – chutiang ti thei emaw ti thiamte Bana Kaih hi a ni. Thil thar ngaihtuah chhuak thiamte tanpuitu tur Innovation Centre leh Incubation Centre kan nei a. An thil hmuhchhuah a taka chantir tura hma an laknaah anmahni thawhpuina tur Bana Kaih Venture Capital Fund kan la nei leh zel a, kan entrepreneur-te tan hian kan inhawng em em a ni.

Dr. Lalrokhawma leh a thawhpuite, Samuel Lifecare & Cosmetics Private Limited hi kan hmathlir tihlawhtlingtu langsar, midangte tan pawha entawntlak taka hma hruaitu an ni a. An chungah kan lawm a. Bul an tan chauh a la ni a, loan lian tham tak nen hma an la tihte pawh kan hria a. Hmasawn zawnga kal zelna tur an neih phawt chuan kan thlahthlam dawn lo a ni, a ti.

Chief Minister hian Mizoram mipuite chu Samuel Lifecare & Cosmetics te products hmang uar a, dawr neitute pawhin an dawrah lo pho chhuahsak a. E-Commerce hmanga sumdawngte pawhin state pawn leh ram pawn lam thlenga lo thehdarhsak turin a ngen a. “Sorkar office lam pawhin an Home Care product te hi leisak ila, i hmansak ang u. Kan ram siam chhuahte a tam thei ang ber hman hi sorkar duh dan a nih avangin The Mizoram Preferential Store Purchase Rules pawh kan siam tha a, kan entrepreneur-te kutchhuak ngaihhlutsak hi kan duh a ni” a ti.

Dr. Lalrokhawma, he company neitu hian report a pe a, kum thum kalta atang tawha bul an lo tan tawh a nih thu leh an thil siam chhuahte chu uluk taka a Formula an chawhchhuah, quality tha tak tura an kalpui a nih thu a sawi. A formula ber kan neih tawh avangin lian thama kalpui thei kan ni tawh a, mipuiten min hmansak duh phawt chuan Mizoram mamawh zawng zawng hi thla ruk chhungin kan siam vek theiin kan ring, kan product-te hi an quality a tha tawk tih hi huai takin kan sawi ngam a ni, a ti. An thil siam chhuahte chu a bur ruak paih mai lo va thunnawn (refill) theih tura an duan deuh vek thu a sawi bawk a. A hmang tawhtute chuan an fak viau zel a, an rawn kal nawn tlangpui a ni, a ti.

A hawnna inkhawm hi Pu Lallawmthanga, Lengpui VCP in a kaihruai a, Pu Lalsawma Pachuau, (Retired FDA Jt. Director) Consultant Pharmacist, Samuel Lifecare & Cosmetics chuan thu sawiin, Pi Mimi Zonunpari, Management In-charge chuan lawmthu sawiin inkhawm a khar a ni.

An product te pho chhuahna dawr an la nei rih lo va, a lei duh emaw zuar chhawng duhte chuan Dr. Lalrokhawma (Rka) hi phone number 8167379173 ah biak theih niin an deliver emaw an thawn thei reng a ni.