Chief Minister Pu Zoramthanga chuan nimin (6.12.2019) khan Union Minister of Road Transport and Highways Pu Nitin Gadkari, Union Tourism Minister Pu Prahlad Singh Patel leh NITI Aayog Vice Chairman Pu Rajiv Kumar te chu New Delhi ah Mizaram mamawh te sawipuiin a kawm.

Chief Minister hian Union Minister of Road Transport and Highways chu a chenna inah a kawm a. Aizawl khawpui helna tur kawngpui thar, Sairang - Zemabawk siam chungchang te, Seling - Kawlkulh - Champhai kawngpui thar sial chungchang te, Kawlkulh -Tuivai kawngpui chungchang te, JICA hnuaia kawng thar sial chungchang te, Durtlang Leitan - Sihphir leh Serkhan - Bagha kawngpui siamthat chungchang te leh lei hlui tawh leh chak tawk lo zawng zawng RCC lei a thlak chungchangte a sawipui. Pu Nitin Gadkari chuan Chief Minister thu thlen te chu lo enzui a tiam a ni.

Union Tourism Minister Pu Prahlad Singh Patel chu a pisaah a kawmin, Chief Minister chuan Mizoram in khualzinte hip turin ram mawi tak, boruak thiang tak leh ralmuang tak a neih thu leh, a mi chengte pawh khualzinte chunga hawihhawm leh that chhuah thin an nih thu a sawipui a. Mizoram tan Comprehensive Tourism Master Plan siam tur leh Project awm sa North East Circuit at Mizoram chu pawmpui turin Union Minister hi ngen in, Thenzawl Golf Course pawh a hun remchang hmasa bera hawng turin a sawm a ni.

Nimin vek khan Chief Minister chuan NITI Aayog Vice Chairman Pu Rajiv Kumar chu a pisaah a kawm a. Carbon trading chungchang te, National Bamboo Mission hnuaia rua leh mau chin chungchang te leh Bamboo Link Road chungchang te an sawi dun a. NITI Aayog Vice Chairman chuan Chief Minister thu thlente chu a lo enzui tur thu leh a theihna kawng apianga puih a inhuam thu a hrilh a ni.

Chief Minister hi Forest Minister Pu TJ Lalnuntluanga, Planning Vice Chairman Pu H. Rammawi leh officer dangten an tawiawm a. Vawiin khan New Delhi atang hian Aizawl ah Chief Minister hi a rawn let leh dawn a ni.