Nimin tlai khan Lunglei DC Conference Hall-ah Bawrhsap Pi K. Lalrinzuali kaihhruaiin Lunglei District huamchhunga Head of Office meeting neih a ni. He hunah hian Lunglei Additional DC-te Pu David Liansanglura Pachuau leh Pu R. Vanrengpuia te bakah Lunglei District Head of Office-te an tel tha hle.

Meeting kaihruaitu Lunglei DC Pi K. Lalrinzuali chuan mahni Department chan theuh fimkhur leh taima taka enkawltu Head of Office-te chungah lawmthu sawiin Department hrang hrang ten thawhhona tha tak nen hma an la tlang thin chu lawmawm a tih thu a sawi a. District ti hmasawn zel tur leh mipuite himna tura dan leh thupek tha taka kenkawh zel anih theihnan Department-ten coodination tha tak an neih chhunzawm zel a tul a ni, a ti. Department-ten District chhunga an hmalakna te an in hriat sak tawn a pawimawh thu sawiin hei hian hna in kal thuah leh duplicacy lo awm palh thei te a veng dawn a ni, a ti bawk. Lunglei District-a Tlabung Sub Division huamchhunga Dan lova khaw din/khaw per chungchang pawh sawilangin Lunglei Bawrhsap chuan Department hotute chu heng khua ah te hmalakna thar kalpui lo turin a chah a. An hnathawhna leh hmalakna apiangah mipui hamthatna dah hmasa zel tura chahin kan hma lawka hunpui lo awm tur Krismas leh Kumthar vuakveta mipuite an him tlan theihna tura theihtawp chhuah turin mawhphurna neitute a chah nawn a. Head of Office-te chu an harsatna tawh te District administration hotute hnena thlen vat thin turin a sawm bawk.

Meeting ah hian Department hrang hrang ten an Achievement Report leh harsatna an neih te sawiho niin meeting neih zawhah DC Bangla ah zanriah an kil ho a ni. 

Attachment

  • Loading attachment...