Vawiin khan Chief Minister Pu Lal Thanhawla’n SBI Branch thar, Digital Branch ‘sbiINTOUCH’ tia hming vuah chu Chanmari ah a hawng a, he Branch thar hi North East-a hetiang digital banking tih theihna branch pangana niin tunlai banking khawl changkang tak tak nena thuam a ni.

Chief Minister Pu Lal Thanhawla chuan SBI in tunlai thiamna leh changkanna in a hrin ‘digital khawvel’ mil a hetiang branch Mizoram mipuite tan an rawn chhawpchhuak chu lawmawm tiin hei hi tunlai thalai digital thiamna nei ten an hman tangkai hle a beisei thu a sawi a. Prime Minister Narendra Modi’n DIGITAL INDIA ruahmanna a duan chhuah atang hian nasa takin mipui rawngbawlna kawng hrang hrangah uar taka digital leh computer thiamna te hman chhoh mek a ni a, mipui pawhin an tangkaipui hle nia a hriat thu a sawi bawk.

Pu Lal Thanhawla chuan India anga ram thangmekah chuan banking lamah hmalakna tur tam tak a la awm nia a hriat thu sawiin hetianga tunlai thiamna hmanga banking system kan tih hmasawn leh kan tih phuisui hi a peng khat a ni a, a dang leh chu thingtlang khaw lamah banking in mipui te a huam zau a pawimawh a, chuvangin thingtlang lamah a tam thei ang berah banking services in mipui a huam theih nana hma la turin SBI hotute hi a chah duh a ni, a ti.

He hun hmanga lokal SBI hotulu PVSLN Murty, Chief General Manager, SBI NE Circle chuan thingtlanga mipui te banking services in a huam theih nan Micro ATM hmanga Bank Mitra kaltlanga hmalakna chu niminah an tan tih sawiin he ruahmanna hi tunah rih chuan Aizawl District tan a ni a, District dangah pawh tan vat turin hma kan la dawn a ni, a ti. Thusawitu dang Pu Kausik Sinha, CDO, Local Head Office, SBI chuan Mizoram mipui te chuan tunlai digital thiamna remchang te an hman thiam a, he branch pawh hi nasa takin an tangkaipui ka ring a ni, a ti.

‘sbiINTOUCH Aizawl hi Hrangbana Building, Chanmari ah a awm a, tunlai khawl changkang ber ber hmanga thuam a ni a, Independent(mahnia inrelbawl) branch anih angin leh digital branh anih angin hnathawk pawh mi pahnih chauh dah an ni. Khawl awmte chu – ATM, Cash Deposit Machine/Recycler, Account Opening Kiosk, Electronic Cheque Dropbox, INB Kiosk, Swayam/SSK(Passbook Printing machine) niin hei bakah Video Councelling Space te a awm bawk. Pawisa lakchhuah, dah luh te, account hawnna zawng zawng leh Debit Card print te chu khawl hmanga tihvek tur a ni.

Mizoram bakah hian Assam leh Meghalaya ah chauh hetiang Digital Branch te hi hawn a ni a, Aizawl bakah Shillong leh Guwahati ah te hetiang branch hi pahnih ve ve a awm a ni.