Nimin tlai khan Sipai lakna chungchanga hotulu Deputy Director General (Recruiting) North East, Brig. Sanjeev Nagpal te chuan Chief Minister Pu Lal Thanhawla chu a chenna inah hmuin, inkawmhona tha tak an nei a, Mizo thalai tam zawk Sipai ah an luh dan chungchang te an sawiho a ni.

Chief Minister chuan Rambuai hmain Mizo tam tak chu Assam Regiment leh sipai unit dang ah te an lo awm tawh thu hrilhin Rambuai chhoh leh a hnu rei fe thleng thalai tam takin sipai lam an hawi lova mahse remna leh muanna awm hnu chuan helam hi thalai ten hawi tawhin tunah chuan Mizo thalai sang fe chu Sipai ah an tan mek thu a hrilh a. Sainik School chungchang sawiin Chief Minister chuan he school hi thalai ten sipai a bik takin officer an luh theihna tur anih dawn avangin a sakna hi chak taka kalpui mek a ni a, hun reilo te a peihfel beisei a ni, a ti. Brig. Nagpal chuan Mizo thalai te chu sipai tha tak an nih thu hrilhin hotu te an zah thiamin an huaisen a ni, a ti a. Mizo thalai tam thei ang ber Sipai ah an tlin theih nan theihtawp a chhuah tur thu Chief Minister a hrilh a ni.