Nimin khan Damcherra BDO Conference Hall-ah Pu H. Lianzela Additional DC Mamit kaihhruaiin Tripura Govt. Official te leh Mizoram Official te chuan 8th Batch Reang (Bru) Repatriation chungchanga endik hna thawh kalpui tura ruahmanna duansa leh thil tul hrang hrang ngaihtuahin coordination meeting neih a ni.

Meeting ah hian Bru Repatriation chhunga Official duty turte tana thil tul hrang hrang, security kal pui dan tur, ei leh in leh zan riah dan tur chungchang ah te 21. 10. 2016 a coordination meeting neih tawha thurel te thlirho leh a ni.

Meeting kaihruaitu Pu H. Lianzela Addl D.C, Mamit chuan Mizoram Officials te leh Tripura Official te inpawh tlang taka Repatriation kalpuina tura coordination meeting neih a ni thin chu lawmawm a tih thu a sawi.

Tripura Govt. Official aiawh Panisagar SDM chuan Mizoram Official ten an mamawh ang chu theih tawp chhuah a thawhpui tur leh Identification kalpuina tura thil tul hrang hrang ah inbuatsaihna paihfel a nih tawh thu a sawi bawk.

Nimin meeting-ah hian Mizoram atangin Pu Lalhmansanga overall incharge, DIPRO Mamit, District hrang hrang atanga Identification team leader te bakah Tripura officials tangin Damcherra BDO Deputy Collector (D.C), Panisagar SDPO, Damcherra OC leh Official dangte an tel a ni.