Chief Minister Pu Lal Thanhawla chuan vawiin khan New Capital Complex, Khatla-ah State Bank of India ( SBI ) New Secretariat Branch thar, Mizoram-a SBI Branch puitling 23 na tur a hawng. Hmeichhe hlang thawktu awmna tur a ni a. He SBI Branch thar hi Sattelite Bank-te tiam chuan a 28 na tur a ni.

 

 

Chief Minister chuan SBI hotu ten helai hmun pawimawh tak maiah branch thar an rawn dah chu lawmthu a sawi a. Mipuite chu bank dukdak lo leh phuahchawp bank te lakah fimkhur hle tura chahin, ‘chiahpuam’ tih hian mi tam tak a tibuai chu pawi a tih thu a sawi a. Bank dukdaklo kan lo bawr nasa lutuk thin hian sum ngaina hnam kan nihzia a tilang a, a vanduaithlak hle a ni a ti a. Loan kan pukte lah kan rulhna a chhe hle thin a, hei hian kan rinawmlo tih a kawk bawk a ni a ti a. Kan in siam that a, tan kan lak angai a ni a ti. Pu Hawla chuan, nationalised leh settled bank te chauh hmang tangkai a, rinawmna nen chhawr thin tura mipuite chahin, bank lam pawh mipui te mamawh hria a zau taka inhawng turin a ngen bawk a. Pu Lal Thanhawla chuan bank nen inthlunna hun rei tak alo neih tawh thu sawiin, kum 9 chhung zet bank hna a thawk tawh a ni a ti. A thawh chhung zawng hian an sawnna apiangah, hnathawh ala duh avangin, a kal zel thin thu a sawi a. A kal duh tawh loh hunah chuan a bang mai a ni tiin, tunlaiah sorkar hnathawk transfer chungchanga ‘mawngfual’ an awm thin chu a hriatthiam loh thu a sawi a. Transfer-na hmuna kal peih lo chu ban mai tur Chief Minister chuan a ti a, sorkar hna kan thawh tirha kan intiam ang ngeiin khawiah pawh lawmtaka thawk mai tur kan ni a ti.

State Bank of India in loan a pek turte hnena a ruahman chu Chief Minister hian a sem sak a ni.

SBI Chief General Manager, NE Circle, Pu AK Deb chuan SBI hi India ramah kum 1806 ah Kolkata ah bul alo tan thu a sawiin, hming dang dangte pawh a lo pu thin tawh a ni a ti a. Tunah hian khawvel ram 33 ah branch neiin ram chhungah ringawt pawh branch 1100 chuang a awm tihthu a sawilang bawk a ni. Mizoramah ah pawh district tinah awmin, North East ah Hqrs chu Guwahati a nih thu a sawi bawk. SBI hian thingtlang kilkhawr ber te pawh Smart Card Technology hmanga an mamawhte an thlen theih thu a sawi bawk a ni. Pu Deb chuan Mizoram atanga SBI hnathawklai 19 te chu Officers ah kaisangin India ram  hmun hrang hrangah an thawh tur thu a sawi bawk a ni.

New Capital Complex a SBI branch thar hawn bakah hian Vaivakawnah branch thar dang, a 24 na tur hawn zui nghal a ni bawk a. New Capital Complexah vek hian a 7th na atan New Secretariat ATM  Pu Vanhela Pachuau, Chief Secretary chuan a hawng nghal bawk a. Hetih rual hian vawiin vek khan ATM thar dang, Vaivakawn, Milleneum Centre leh Dawrpui ah te hawn thar a ni bawk .

SBI thar hawn inkhawmah hian Chief Minister Pu Lal Thanhawla hi a nupui Pi Lal Riliani leh Home Minister Pu R. Lalzirliana ten an tawiawm a. Ministers dangte, Parliamentary Secretaries, MLA te bakah Khatla khawtlang hruaitu te an kal tha hle a ni