1203/2022-2023 

Lunglei the 8th July, 2022 - Vawiin khan Mizoram Chief Minister Pu Zoramthanga chuan Lungleiah Ministry of Development of North Eastern Region (DoNER) hnuaia Non-lapsable Central Pool of Resources (NLCPR) kaltlanga cheng nuai1040 senga ruahman School Education Complex leh MBSE Regional Office, Lunglei te a hawng.

He hunah hian School Education Minister Pu Lalchhandama Ralte chu khualzahawm a ni. 

Vawiin hawnna inkhawm, Dr Lalzirmawia Chhangte, Secretary, School Education Department kaihhruaiah Chief Minister Pu Zoramthanga chuan zirna hmasawnna ruhrel liantham leh changtlung tak School Education Complex leh MBSE Regional Office, Lunglei chu Mizoram mipuite tan malsawmna ropui tak a ni tiin zirna leh khawtlangah hmasawnna nasa tak thlentu anih ngei a beisei thu a sawi a. Ram leh hnam hmasawnna leh zirna chu kalkawp tlat an nih thu sawiin zirna chu kan eizawnna leh hnathawhna mai bakah khua leh tui tha, mi pangngai a min siam tu a ni a, Pathian ropui zia tarlan nan leh amah chawimawi nan kan hman thiam a tul a ni, a ti bawk. Zirna hmasawnna ruhrel thar te hi neitu rilru pu a, duat taka enkawl turin mipuite a sawmin a chah bawk a ni.

He huna khualzahawm School Education Minister Pu Lalchhandama Ralte chuan zirna lama Mizorama hmahruaitu ni thin, Lunglei khawpuiah zirna kaihhnawih hmasawnna ruhrel ruahman a ni chu a inhmeh takzet ani tiin heng ruhrel te hian rah tha tak chhuahin zirna lama chona thar leh rilru thar siamtu anih ngei a beisei thu a sawi a. Zirna hmasawnna turin Mizoram mipuite an thahnemngai a, tun hnaiah public participation a tha em em a, sawrkar school ah te enrollment a pung chho zel hi a lawmawm takzet a ni tiin Zoram mipuite chungah lawmthu a sawi a. Kan ram leh hnam dinchhuahna chu zirna ah a in nghat tlat a ni tiin School Education Department thawktute leh zirtirtu kalkhawmte chu theihtawp chhuaha hmalak pui zelah a sawm a. School Education Complex leh MBSE Regional Office, Lunglei bultana hma lo la tu Pu Joseph Lalhimpuia hmalakna leh thahnemngaihna avangin lawmthu a sawi bawk a ni.

Pu JH Zoremthanga, Chairman, MBSE pawhin thu sawiin MBSE Regional Office, Lunglei chuan District pali – Lunglei, Hnahthial, Lawngtlai leh Siaha an bial thu a sawi a. Mizoram zirna ti hmasawn turin MBSE chuan theihtawp chhuah mek zelin National Curriculum Framework leh NCERT base in syllabus leh textbook te siam anih thu sawiin Class IX leh Class X  zirlaite tan Science and Mathematics-ah Bilingual textbook (Mizo leh English) te pawh ruahman mek niin kuminah zawhfel tum anih thu a sawi a ni.

Dr H. Lalthlangliana, Director, School Education Department chuan technical report a pe a, Lunglei DC Pu Kulothungan A chuan lawmthu sawina hun a hmang a ni. 

Lunglei School Education Complex leh MBSE Regional Office Building te hi Ministry of Development of North Eastern Region (DoNER) hnuaia Non-lapsable Central Pool of Resources (NLCPR) kaltlanga a zavaia cheng nuai1040 senga ruahman a ni. Heng building pahnih sak hnathawktu hi LB Associates, Bungkawn, Aizawl niin 14/08/2018 ah hna thawh bultan niin 28/01/2022 ah zawhfel a ni a. School Education Complex hi nuai 800 senga sak niin chhawng sarih a ni a. A building hi 3085.25 square metres a zau ni a, staff motor parking, canteen, driver room, SDEO N leh SDEO S office, DEO office, Samagra Shiksha Office leh Conference Hall te a awm a. MBSE Regional Office building hi cheng nuai 240 senga sak niin chhawng 4 a ni a. Ground Floor ah MBSE Regional Office awmin a chung floor pathum hi Teachers' Residential Training atana ruahman a ni a, khum 20 awmna zirtirtute tana thlenna hmun leh conference hall te a awm a ni. Education Complex ah hian tui litre nuai 1 len na rainwater harvesting ruahman a ni bawk. 

Education Complex leh MBSE Regional Office, Lunglei hawnna ah hian Lok Sabha MP Pu C. Lalrosanga, Lunglei HPC Vice Chairman Pu Lawmawma Tochhawng, Pu C. Lalramzauva, Adviser to CM, Pu Joseph Lalhimpuia, Ex MLA, Lunglei District official-te, party hruaitute, tlawmngai pawl aiawhte, leh sawm bik dangte an tel a. Lunglei zaithiam lar Vanrammawii Pautu, Pensy B. Lalthangliani leh Lalenkawli Pautu te an zai a ni.