Mizoram Chief Minister Pu Lal Thanhawla chuan nizan (August ni 26, 2013) khan 14 Assam Rifles Batallion Headquarters, Serchhip ah 14 Assam Rifles ten “Battle of Purr” (1960), hriatrengna puala “Bahadur Day” an lawm chu a hmanpui.

Nizan “Bahadur Day” puala inkhawm buatsaihah hian thu sawiin Chief Minster chuan Purr khua a indona a Assam Rifles te huaisenna leh tawrhchhelna chu midangte fuih tu leh inpekna thuk zawk siam sak tu ani a ti a, India ram zahawmna leh ropuina humhim tura Assam Rifles ten huaisen taka India ram thendarh tum hel ho an beihlet dan te chu ngaihsanawm atih thu sawiin an huaisenna vangin India ram pawh thendarh nilovin, ram zahawm tak leh ropui tak anihna humhim a ni a ti a, Assam Rifles te huaisenna leh inpekna chu fak tlak a ni tiin lawmpuina leh duhsakna thu a hlan nghal bawk a ni. Chief Minister chuan Battle of Purr a tel ve Mizo pasaltha huaisen pakhatin a nunna a hlan ve thu sawiin Sipai huaisen chawimawina hial a dawng a ni a ti a, hemi indona a tel ve tho mizo pasaltha la dam pakhat “Bahadur Day” hmang tura an zinga a la tel ve thei chu lawmawm a tih thu leh ropui a tih thu a sawi bawk a ni.

“Bahadur Day” hi kum 1960 August ni 25-28 chhunga Nagaland Kohima District a Purr khuaa Naga hel ho leh 14 Assam Rifles te inbeihna a 14 AR te huaisenna leh tawrhchhelna hriatreng nan a hman a ni a, he indona ah hian Purr khua a 14 AR post chu Naga hel 500 rualin kil tin atanga hual betin an bei a, Assam Rifles ten helho hi chhangletin an silaimu leh ei leh in tur a ral thak thlengin an bei let a, ni li chhung huaisen taka an beihlet hnu ah Indian Air Force ten an mamawh an supply theih tak avangin helho hi an nawr let thei ta hlauh a ni.

He Battle of Purr a Naga hel ho kaihruaitu an Group Leader SS Gen Zuheto, Sema tribe zing a mi, “Father of the Naga Army” ti hiala an koh thin chuan kum 1973 khan a ho te mi 850 zet nen an silai tungin, nunphung pangngai zawm turin an in surrender a, a hnu ah Ministry of Home Affairs, Government of India chuan Zuheto leh a thuihruaite hmangin 111 Batallion BSF a din a, Zuheto hi Commandant hmasa ber ah a tang nghe nghe a, he batallion ah hian DIG thleng kaisangin a pension a ni.

14 AssamRifles hi  January ni 1, 1959 khan Lt Col Hoshyar Singh, Military Cross of Rajputana Rifles in Meerut-ah a din a. An hnathawh pangngai, ram ralmuanna vawnhim leh helna tukdaih bakah mipui vantlang hamthatna tur chi hrang hrang, Military Civic Action Programme hnuaiah an thawk thin a. Serchhipa an awm hma hian Nagaland ah te, Manipur leh Tripura hmun hrang hrangah an lo awm kual tawh a. Serchhipah hian May ni 4, 2011 khan an rawn awm ve leh ta a ni. Tunah hian he battalion hi Col.Kushal Singh Rajawat, Commandant leh Officer dang 13 ten an enkawl mek a ni.