Vawiin khan BNRGSK Hall, Lungdaiah Lungdai leh a chhehvel khua a thalai te tana buatsaih kar hnih chhung awh tur Vocational cum Skill Development Training chu Pu Hmingdailova Khiangte, Chairman, Mizoram Youth Commission in a hawng.
He Training hawnna inkhawm Pu Lalthanpuia, Lungdai YMA President kaihhruaiah hian Pu Hmingdailova Khiangte chuan thalaite chu an hnathawh theih tawk leh thiam thil te zahpui lova, ti hmasawn zel zawk tura fuihin, Mizoramah hna thawh tur a vang kan tih laia ramdang atanga lo kal ten thawh sen loh an hmu chu zahthlak a tih thu leh tan lak a ngaih thu a sawi a. Mizoram chhan a humhim kan duh anih chuan hna kan thawh taihmak a ngaih thu sawiin, thalai kalkhawm te chu he training buatsaih hi tangkai tak leh dinchhuahpui ngei na a tan a hmang turin duhsakna a hlan a. Instructor te chu zirtirna tha tak taima tak a pe tur leh training tur thalaite chu instructor te thu awih tur leh rilru nei tak a zir turin a chah a ni.
He Vocation cum Skill Development Training ah hian beauty culture, puanthui, sam siam, mobile repairing leh carpentry ah training pek a ni ang a. Mi 50 hnenah ITI atanga zirchhuak ten training an pe ang.
Training senso hi Mizoram Youth Commission leh Workers Welfare Board in an tum dawn a ni. He Training hawnna inkhawm zawhah hian Govt. PM High School Lungdaiah career guidance hun hman chhunzawm nghal niin, Pu Lalmuana Principal, ITI chuan zirtirna a pe a. Pu Lalmuana chuan zirlai naupang te chu tum mumal tak nei chunga lehkha zirtur leh tunlai khawvel inelna sang taka dingchang thei tur in an thil tih na kawng tinrengah tih tak zet leh rilru nei taka inbuatsaih tur in a chah a. Thiam thil bik neih a that thu leh a tih hmasawnna kawnga theih tawp chhuah a tul thu a sawi bawk.
