Vaivakawn to Mizoram University (MZU)  kawng chungchangah Public Works Department chuan a hnuai a mi ang hian thuchhuah a siam:-

Vaivakawn to Mizoram University (MZU) kawng hi tunhma atangin ngaihsak hlawh lohvin rei tak a lo awm tawh a. Mipui leh a hmangtu pawhin harsatna namen lo an tawk a. Tun sawrkar hian hma lain JNNURM hnuaiah Project Report siamin hemi kawng bik atan hian Central Government atanga sanction Rs.19.07 Cr. hmuin, 1st Installment pawh June, 2012 khan released a ni. A hna pawh hi tender-in, contractor hnenah pek a ni a, amaherawhchu a hna tan anih hnu reiloteah furin a nan buai tak avangin hna chhunzawm mumal theih a ni ta lo a ni.

Vaivakawn - MZU kawng chungchang Local TV leh Chanchinbu thenkhatah Chief Minister hial puhmawhna a lo lang a, thudik chu hetiang hi a ni e. He kawng laih zauh tender chhangtu 6 zingah tualchhung mi 4 te chuan tehfung pawimawh ber zinga pahnih (i) kum 3 kalta chhunga hnathawh (average annual turnover) leh (ii) Hna thawk tura a din hmun (bid capacity) ah an tling lo vek a. Thawk tur tehfung a tling (qualify) zinga a rate hniam G.P.Project te chu Department in a thlang mai a ni. Kawng chhuat phah hna thawk tur hian tender chu ABCI Infrastructure Ltd. leh Sunshine Overseas Pvt. Ltd chauhvin chhangin a chhang hniam zawk Sunshine Overseas Pvt. Ltd. chu dan anga thlan mai a ni bawk.

Chutiang bawkin Aizawl City Road siam thatah leh Tuirial - Serchhip kawng siamtha tura tender chhangtu zingah Sunshine Overseas Pvt.Ltd chu rate hniam ber a nih vek avanga thlan mai a ni a. Mimal induhsakna engmah a awm lova. Contractor-te tender chhanna te, Comparative Statement leh Documents engkim PWD Office-ah a duh tan en theih vek a ni.