Vawiin chawhnu kha Chief Minister Pu Lal Thanhawla chuan Serchhip DC Conference-ah NEDP hnuaia khua leh tui harsa zawk ten chenna In tha zawk an lo neih theih nan a hmalakna, Chief Minister's Rural Housing Scheme tlangzarhin beneficiary 200 hnenah tanpuina a sem a. Hemi rual hian Serchhip District chhunga NLUP hnuaia Horticulture Trade beneficiary 495 te hnenah tanpuina Rs.1,52,74,268 a sem bawk.

Chief Minister chuan kuthnathawk ten mahni khawbu zawl theuhah leirem rap a, khaw eng hmu a thlamuang taka an awm theih chu sawrkar duh ber a ni tiin, NLUP leh vawiina hawn tak CM Rural Housing Scheme te chu chumi rilru atanga lo piang a nih thu a sawi a. Rural Housing Scheme chu chenna in thar sakna tur ni lovin mahni chenna inchung chih thatna tur nei zo lo ten fur laia thlamuang taka an lo awm theih nana ruahman a nih thu a sawi a. Vawiina heng hmalakna pahnih hnuaia tanpuina dawngtute chu dik leh rinawm taka hmang turin a chah bawk a ni.

Chief Minister chuan NLUP chu thlakip a sorkar hnathawk hlawh la te leh sumdawng hausa te nilovin, mi harsa kuthnathawka eizawngtute an lo intundin a, an thawhrim rah mawlsawmna an lo hmuh theih nana bultanna siamsakna tur a nih thu a sawi a. He hmalakna avanga Mizoramin ei leh bara hmasawnna a hmuh thu sawiin, NLUP kalpui a nih atangin India rama state thang chak ber pali zingah Mizoram a tel thu leh, a dangte chu Gujarat, Jharkhand leh Tripura annih thu te; kum kaltaa Per Capital Income (PCI), kum khata mimal sum lakluh chawhrual chu India ram pum aiin Mizoram a san zawk thu te CM chuan a tarlang a. Hemi ni thei tura thawhtu chu NLUP niin, a hmanrua chu Line Department theuh te leh a dawngtu zingah a tam zawkin tha taka an hman vang a nih thu a sawi. Pu Lal Thanhawla chuan Mizoram chu subsistence economy, eitawk tawk economy atanga market economy a inhlangchho turin sawrkarin NEDP a duan thu leh, chu chu NLUP hlawhtlinna ti nghettu a nih tel thu a sawi bawk. Hemi hnauiah hian mi remhria leh taima te chuan an thiamna hmanga, an bultannah sawrkar tanpuina leh kawhhmuhna hmangin eizawnna ngelnghet siamchhuaka midang tan eizawnna siamtu an lo ni thei dawn a ni, a ti.

Mizoram in Infrastructure tihmawsawn tura hmalakna kal mek zingah Sairang thleng rel kawng lian chi broad gauge a siam chu chak taka kalpui a nih mek thu te, chumi kal zelah chuan Lawngtlai thleng Rel kawng tlang tura ruahman a nih dan te leh, Burma rama Sittwe Lui-ah lawng chawlhna lian takin a hmuah thu te sawiin, Mizoram hi India leh Asia chhim chhak ramte nena insumdawntawnna chhuahka pawimawh a la nih dawn chauh a ni, Chief Minister chuan a ti a. Chutihrual chuan kut tlinglo a pawisa lakluh pawi ti lo te avangin tum anga chakin hna a kal theilo a, mipui tupawh eng hna pawh thawk ni ila, kan thawh chin leh thlen chin inang lo mahse, kan zavaia kan hnaa kan rinawm a pawimawh hmasa a ni, a ti. Rahbeh ngamawmloh khawpa midangin min hmuh theih nan kan than a ngai a, kan economy leh kan nun phungah mi zah tlaka kan insiam a ngai a ni, a ti.

Vawiin programme hi Serchhip DC Pi Sangchin Chinzah chuan kaihruaiin, Pu Vanlalhmachhuana, Serchhip RD Block BDO leh Pi M. Vanlalzami, District Horticulture Officer ten report an pe a. Pu V.L. Remliana, Project Director, DRDA chuan lawmthu sawiin hun a khar a ni.

Chief Minister's Rural Housing Scheme hnuaiah hian Serchhip District chhungah a hmasa ber atan beneficiary 200 thlanchhuah an ni a. East Lungdar RD Block atangin beneficiary 38 awmin, Serchhip RD Block huamchhungah 162 an awm thung. Beneficiary-te hi uluk taka thlan niin, a tirah Gram Sabha koh a ni a; tualchhung mipui kalkhawmten he tanpuina dawng awm nia an hriat te an thlan hnuah, chung mite chu VLA ten a hmunah chik taka endikin, District Level Selection Committee hnenah report an thehlut a. District Level Selection Committee chuan uluk takin report atang chuan beneficiary awm tura an hriat te an lo thlang ta a ni. Tanpuina hi beneficiary pakhat in Rs. 50,000 zel an dawng dawn a. Installment hmasa zawkah Rs. 30,000 pek theuh niin, an hman that dan azirin a dang Rs. 20,000 chu installment pahnihna atan sem leh a ni ang. Tanpuina hi Account Payee Cheque a sem niin, a dawngtu tur ngei ten a puma an chan theihna turin a ni.

Vawiina NLUP tanpuina sem hi Horticulture Department hnuaia 3rd Phase leh 4th Phase tanpuina a ni a. 3rd Phase hnuaiah beneficiary 316 awmin, 4th Phase hnuaiah beneficiary 179 an awm a. Tanpuina hi cheque a sem a ni.