Vawiin khan Lawngtlai District Task Force Immunisation (DTFI) chu Lawngtlai DC Conference Hall-ah Bawrhsap Pu N. Chakhai MCS hovin an thu khawm a. Measles-Rubella hri danna pek beihpui thlak tur chungchang an sawi ho.

He thut khawmah hian Lawngtlai CMO Dr Lalthlamuana, DIO Dr S. Thaizi, WHO-a SMO Dr Amitabha Sarkar, health department-a thawktute, zirtirtute, kohhran hruaitute leh tlawmngai pawl ai awhte an tel a. April 16, 2018 atanga tan a, chawlhkar 5 chhung Lawngtlai District-a sentut hri danna pek beihpui thlak tur (Measles-Rubella vaccination campaign) atana hriat tur pawimawh hrang hrang leh meeting-a koh khawmte’n an mawhphurhna te inhrilhfiah a ni a. MR vaccination campaign-in a tum, thla 9 leh kum 15 inkar naupang zawng zawng vaccine pek vek chu a hlawhtlin theih nan mahni zawn theuhvah theih tawp chhuaha hma la turin member-te chu ngen an ni.