No.2116/2021-2022

Aizawl the 3rd September, 2021: Chief Minister Pu Zoramthanga chuan vawiin khan Serchhipa Integrated Tourist Circuit, North Eastern Council (NEC) atanga sum dawn cheng nuai 468.81 hmanga siam chu a hawng. He tourist circuit hi paragliding hmun behchhana guest house building, car parking, nature trail etc. siam niin, Mizoram Aero Sports Association (MASA) Gen. Hqrs. in an thawk a ni.

Chief Minister Pu Zoramthanga chuan paragliding hmun ngelnghet leh a behbawm hrang hrang, khualzin hip theitu hmun tha tak ruahman a ni chu lawmawm tiin, Mizoram leh a bikin Serchhip khaw mipui tan kawng hrang hranga hlawkna thlentu a nih a rin thu a sawi a. Tourism tihhmasawn zelna turah hmathlir thui tak nei chunga ruahmanna siam a pawimawh thu a sawi a. Mizoram chu kawng hrang hranga hmasawn theihna nei a nih thu leh, chu hmasawnna thlen tur chuan rilru zau tak nen taimakna nen bawhzui a ngaih thu a sawi. Chief Minister chuan vawiina tourist circuit angah leh hmasawnna ruhrel dang din turah ngaihtuah pawimawh tak pakhat chu tui hnar a ni tiin, hemi atan hian ruahtui dawng a tam tak dahkhawlna thamna tur ruahman tha a tih thu sawiin, India sawrkar pawhin tunah chuan a thupui ber pakaht chu "catch the rain" tih a nih thu a sawi.

Chief Minister chuan vawiina he hmun sak theih nana NEC lam thahnemngaihna chungah lawmthu a sawi bawk a. Sawrkar laipuiin hmarchhak state te tana hmasawnna hna thawhna tura NEC leh DoNER a sum a dah state tin ten an hmuh thatloh thu sawilangin, sawrkar laipuia a ministry changtu hnenah pawh a kalphung hi entha tura a lo thlen tawh thu a sawi bawk.

Khualzahawm Tourism Minister Pu Robert Romawia Royte chuan adventure sports ah Mizoram chauh nilo, north east India leh India ramin bung thar a kai ta a ni, a ti a. International event thleng zel thei tura hmathlir nei turin MASA leh Serchhip district hotute chu a chah a ni. Tourism lama Mizoram tihhmasawn zelna turah Minister Pu Robert Romawia Royte chuan sawrkar tih turah chauh dah lova private lamin an ngaihsak a hma lak nachang an hre thar zel chu lawmawm tiin, a nachang hre belh hlawm zel ila a ti a ni.

Special Guest Adviser to Chief Minister Pu C. Lalramzauva pawh thu sawiin, MASA hmalakna chungah lawmthu a sawi a. India leh ram dang atanga paragliding a tui mite fuamkhawmna tur hmun tha siam puitlin a nih theih nan a NEC leh Tourism department hmalakpuina chungah lawmthu a sawi bawk.

Khualzahawm Serchhip bialtu MLA Pu Lalduhoma chuan vawiina an hmun hawn chu paragliding atan world class flying site a nih mai bakah khawvela thlawhna hmun him bera vuah a ni chu lawmawm a tih thu a sawi a. Paragliding lamah thalaite an lo tui thar a beisei thu sawiin, helai hmun hian nakin zelah eizawnna kawngah pawh Serchhip tan rah tha a chhuah ngei a beisei thu a sawi.

Vawiin programme-ah hian NEC Adviser -Banking, Industries and Tourism Er. R. Lalrodingi chu special guest a ni bawk a. Project hmalaktuten a hun tuk chhung aia hmaa an sa zo chu fakawm a ti a. Tourism lama nasa taka hmasawn theihna Mizoramin a neih dan leh, chumi atan chuan state mipui kan tanrual a pawimawh thu te sawiin, kan ram, kan thil neihte hi midangin rawn ngaisang tura kan duh chuan keini a chhunga cheng, a neitute hian ngaihsan kan thiam hmasak a pawimawh a ni, a ti.

Pu TC Pachhunga, Youth Affairs and Tourism Development Board Vice Chairman pawh a vawiinah hian telin, Tourism Department hotute leh Serchhip district hotu pawimawh tak tak an tel bawk. Inkhawm hi MASA Gen. Hqrs President Pu J. Vanlalliana chuan kaihruaiin, Technical Consultant Er. Robert Lalremruata hnen atangin technical report ngaihthlak a ni a; MASA Sub Hqrs. Serchhip President Pu C. Lalhminghlua chuan lawmthu sawiin hun a khar a ni.

He tourist circuit hi kawngpui atanga Km 3-a hlaa awm a ni a, a panna kawng hi motor lian kal theih (truckable)-in siam a ni. Mikhual 30 chuang thlen theihna tura ruahman niin room tin hi bathroom nena thuam vek a ni. Khualzinte tana lirthei dahnaah harsatna awm lo turin lirthei 20-25 dah theihna tur parking siam a ni bawk.

He building hi Mizorama green building hmasa ber a ni a, a building hi Pre Engineering Building (PEB) leh Light Gauge Steel frame (LGSF) combine a siam a ni. Bang (wall) atan cement fibre board hman a ni a, a bang karah hian rock-wool dah a ni bawk. Hei hian sik leh sa lakah a chhung boruak a vawng tha dawn a ni. Building hi lirnghing na tak 7 magnitude pawh dawl zo tura duan a ni bawk.

Paragliding take off point hi international standard (20 to 30 degree slope)-in siam a ni a, spectator gallery a awm bawk. The Fédération Aéronautique Internationale (FAI) leh Paragliding Accuracy World Cup (PGAWC) te pawhin take off point hi an pawm thlap a ni. Hemi atan hian mual pahnih rawt hniam a vur lehin a mual pakhata siam a ni.

Nature trail metre 150 zeta thui metre 3-a zau siam a ni a, a tira ruahman danah chuan 1.2 metre tur a ni a, mahse, a taka hna thawh a nih hian zau deuh zawk hi tha zawk tura ngaih a niin contractor te nen inbiakrem hnuah siam that a ni.

He project atana senso zawng zawng hi cheng vaibelchhe 4.68 chuang hret a ni a, North Eastern Council (NEC)-in a vaiin a tum a, Mizoram Aero-Sports Association (MASA)-in a buaipui a ni. Mikhual thlenna tur hi mi pathum zelin room pakhat intawm tura room 10 ruahman bakah delux room pahnih siam a ni a; Electric power supply-ah harsatna a awm lohna turin building kawt, take off point leh parking-ah te generator leh solar light te chhawp a ni bawk.

Attachment

  • Loading attachment...