No.2115/2021-2022

Aizawl the 3rd September, 2021 –Vawiin chawhnu khan Lunglei DC Conference Hall-ah Teachers’ Day 2021 pualin program hman niin ‘The Mizoram State Level Award to Meritorious and Outstanding Teachers 2021’ lawmman dawngtu Pi Vanlalthangi Chhakchhuak chawimawina hlan a ni.

He hun hi Lunglei SDO (S) Pi C.Lalduhzuali’n kaihruaiin District Level Committee for Celebration of Teachers’ Day member-te, YMA, MHIP, MZP, MSU hruaitute leh sawm bik dangte an tel.

Lunglei DC Pu Kulothungan A chuan zirtirtu taima leh zirlaite tana theihtawp chhuaha hnathawktu leh Lunglei District ti hming tha thu Pi Vanlalthangi Chhakchhuak, Headmistress, Primary School II, Electric Veng chu a lawmpui takzet thu sawiin District tana mi chhuanawm leh entawntlak zirtirtu kan nei hi kan vannei takzet a ni, a ti a. Naupan tet lai atanga inzirtirna leh inkaihhruaina a pawimawh takzet thu sawiin hmasawnna daih rei leh tlo nei turin zirna lama hmasawn chu thil pawimawh hmasa berte zing ami a ni tiin Teachers’ Day 2021 pualin Lunglei District-a zirtirtu zawng zawng te duhsakna a hlan a ni.

Pi Vanlalthangi Chhakchhuak hi Primary School II, Electric Veng Lungleiah Headmistress hna a chelh mek a. Zirlaite tan theihtawp chhuahin online class te pe in YouTube channel a siam a. Sap tawnga video awm ho chu mizo tawng ngeiin naupang ten an hriatthiam theih tura siamin hei hi zirlaiten an hlawkpui hle a ni. Tin, School naupang uniform te pawh mawi zawkin an thlak a. A post a zawm tirh ah zirlai enrollment ah naupang 26 awmin tun dinhmunah zirlai naupang 103 an nei mek a ni. Pi Vanlalthangi Chhakchhuak hian a hmalakna apiangah a chhungte leh a thawhpuite tawiawmna tha tak a neih thu te saw in an chungah lawmthu a sawi a.

Vawiin program-ah hian Pu H. Sangthanga, SDEO Lunglei South chuan State Teachers Awardee chanchin tlangpui sawina hun hmangin, MZP leh MSU hruaitute pawhin thusawina hun hmangin Lunglei DC, MISSTA, MHIP, MZP ten chawimawina citation leh thilpek an hlan a ni. Pu KC Lalrinmawia, DEO Lunglei District chuan lawmthu sawiin hun a khar a ni.