Vawiin khan Chief Minister Pu Lal Thanhawla’n Serchhip, Khawte Tlangah Tourist Lodge cheithat leh cheibawl leh Tourist Cottage sak thar pathum te chu a hawng a. A hawnna inkhawm hi DC Conference Hall a neih niin he inkhawm hi Tourism Minister Pu John Rotluangliana’n a kaihruai a, he programme ah hian Pi Lal Riliani; Parliamentary Secretary Pu TT Zothansanga leh Tourism Department hotulu te an tel a ni.

Chief Minister Pu Lal Thanhawla chuan Tourism Minister leh a thawhpuite hma lakna leh thawh rimna avangin Tourist Lodge hawn theih a ni ta chu lawmawm a tih thu a sawi a. Mizoram House ah te chuan a thleng tur bituk leh chawi te a awm a mahse Tourist Lodge ah te chuan thleng tur bituk a awm lova, VIP leh VIP lo a awm lova, a duh apiang leh a mamawh apiang te thlenna atana ruahman a ni a, fai leh thianghlim taka hman chu a thlengtu te mawh niin dimdawi taka neitu rilru pu a a hmun hma te enkawl leh vawnhim a tul a ni, a ti a.

Mizoram House hman dan chungchang sawiin Chief Minister chuan Sawrkarin tanpui ngaite tanpui turin leh damlo te a ngaihsak avangin vei vahna tur motor te leh nurse te a dah thin a, mahse heng remchanna damlo bik tana tih bik te hmangsual an awm thin chu pawi a tih thu a sawi.

Chief Minister in New Economic Development Policy chungchang sawiin NEDP chu NLUP a hlawhtling zual te hlawhtlinna chhawmdawl nan leh vanduai vanga duh anga hlawhtling thei lo te chhawmdawl nan leh an kaihhruaina atan leh market economy ah Mizoram hruai lut chho turin mithiamten an ruahman a ni a, NLUP hlawhchhamna a ni lo, a ti.

Pu Lal Thanhawla chuan Mizoram chu State-te te zingah a ti tha pawl anih thusawiin Central Sawrkar pawhin an rawn ngaihven hle a, tunhnaiah pawh Look East Policy tih hlawhtlin nan Sittwe chhuahka chak taka buatsaih nan India sawrkar chuan Burma sawrkar chu tanpuina sum a pe a. Mahse kut tlinglova sum lak pawisa lovin Mizoram chinah heng hna hi an ti thuanawpin an ti sukuk a, hetiang tih ching mite avang tho in Sairang rel kawng sial mek pawh a hun taka peihfel loh a hlauhthawnawm a ni, a ti a. Sawrkar programme leh malsawmna kan dawn te hi lawmna chang hria a, Pathian chawimawina atan kan hman thiam a tul a, chutiang tur chuan Ringtu kan nih angin kan rilru leh kan ngaihtuahna te kan buatsaih a pawimawh, a ni a ti bawk.

Tourism Minister Pu John Rotluangliana chuan Tourist Lodge te hi official tan chauh thlenna tur a ni tih ngaihdan awm thin chu a dik lova, mipui te ta,mipui te tana awm a ni tih kan hriat a tul a. Ram chhunga thil tha awm chu mipuite ta anih angin heng thil te hi thinlung taka neitu rilru pu a, duat taka enkawl leh vawnhim a pawimawh a ni, a ti a. Serchhip mipui te chu a neitu an nih angin uluk takin Tourist Lodge leh a hmun hma te enkawl turin a chah a ni.

Parliamentary Secretary Pu T T Zothansanga pawhin thusawiin tourism tih hmasawn nan kawng hrang hrangin hma lak mek a ni tiin heng sawrkar hmalakna te hi tawiawm turin mipuite a ngen a ni.

Serchhip DC Dr. Lalrozama chuan Tourist Lodge hawn chu District tan rahbi pawimawh tak leh District tihchangtlunna kawnga hmasawnna anih thu a sawi.

Serchhip Tourist Lodge Building leh Cottage sak nan hian June ni 30, 2012 khan cheng nuai 172 sanction hmuh a ni a. He sum hmang hian Building awmsa chu cheithat, cheibawl leh thuamthat niin Tourist Cottage 3 sak a ni a, Approach Road leh kawtzawl(courtyard) te siam a nih bakah RCC tui dahkhawlna pawh siam a ni bawk.

Tourist Lodge Building cheithat hi chhawng hnih niin khualzin thlenna room 7; suite room 3; dormitory 1; dining room 1; office 1; Lounge 1; caretaker room 1;lounge 1 leh store room 2 bakah RCC a siam tui dahkhawlna tanky litre 45,000 dawng siam a ni a. Heng zawng zawng atan hian cheng 68,05,000 (internal electrification telin) sen a ni a. He building plinth area hi square metre 847. 45 zau a ni.

Tourist Cottage pathum hi RCC a sak niin Cottage pakhat plinth area hi square metre 84 a ni a, heng pathum hi cheng 90,23,600 (internal electrification telin) senga sak a ni a. Approach Road hi metre 130 a thui niin kawtzawl (courtyard) zau zawng hi square metre 700 a ni a, hemi atan hian cheng 13,73,400 sen a ni.

He hna hi June 2013 ah tan niin October 2014 khan a pumpui zawhfel a ni.