Vawiin khan DIET Serchhip Institutional Building thar, cheng nuai 233.53 seng a sak chu Chief Minister Pu Lal Thanhawla chuan khuallian niin a hawng. School Education Minister Pu H. Rohluna chu khualzahawm a ni.

Chief Minister Pu Lal Thanhawla chuan tun kum 10 chhungin education lamah Mizoramin hma kan sawn nasa hle a ni, tiin DIET building hrang hrang pawh district tinah tun hnaiah hawn a nih thu leh Serchhip District chu DIET building hawn hnuhnun berna a nih thu a sawi a. Zirna tihmasawn turin kawng hrang hrangah a tul angin sawrkarin hma a la zel a theihtawp a chhuah thin a ni, Chief Minister chuan a ti a. Chung zingah chuan India state zinga a hmasa ber pawl ni tura Education Reforms Commission din a nih thu te, chumi atanga textbook leh curriculum reform siam takin hmasawnna a thlen dan te, zirna chhawrtlak chher chhuak a "export quality education" nei tura zirlaibu thiamna bakah skill development lama hmalakna te a sawi a. Khuallian chuan Infrastructure tha tak takte hi siam a nih chhan hre reng chunga tangkai taka hmang turin kalkhawmte a chah a. Building vawn fai ngaipawimawh tur a chah in, Serchhip DIET campus chei nan thingphun an uar chu a changkang hle a a hriat thu a sawi bawk. Chief Minister chuan zirtirtute chu an mi zirtirtute tana "role model" tha ni tur a chahin, ab hawiher, incheina leh tawngka chhuak ahte fimkhur a tul thu a sawi a. Zirlaite thiamna leh an hmabak innghahna chu zirlaite an nih avangin an mawhphurhna hre reng chunga an hnaah thahnemngai taka thawk thin turin a chah. Pu Lal Thanhawla chuan Mizote zingah a tam zawk chu state pawn a chhuak a hnamdangte nena chetla kan tlem avangin tawng kan thiamloh a, kan hnufum bikloh nan hnamdang tawng thiam a pawimawh a ni, a ti a. India khua leh tui kan nih avangin Hindi leh English chu tlangnel ve theihna tur chin chu thiam ve a tul thu a sawi.

Khualzahawm Minister Pu H. Rohluna chuan tunhnaia district pariatah DIET building sak tura ruahmanna siam te tihlawhtling a lungawithlak taka thawktuten a sak hna an zo chu lawmawm a ti a. Sum lo kal atangin a chhung cheina tur te awm tel thinlo mahse sawrkar hotute hmalakna avangin building mamawh bungrua leh zirlaite mamawh hmanrua hrang hrangte dah a ni thei chu a lawmawm hle bawk a ni a ti. Education Minister chuan zirna tihmasawn tura sawrkar hmalakna hrang hrang a sawi a. Education infrastructure lamah Mizoramin hma a sawn thu sawiin, ram pawna bank leh financial institution lian atang tein zirna lama hmasawnna atan Mizoram sum a puktir thu te a sawi bawk. Zirlaiten zirtirtu tha an neih theih nan a zirtirtute lak leh hnathawh kalphunga inkaihhruaina pawh engemawchen siamthat a nih thu sawiin, school kilkhawr zawka uaptu headmaster neilo an awm thluah chu pension dawn hnaia headmaster tura in dah thin a nih avangin kum la naupang zawkte pawhin headmaster an kai thuai theih nan hmalak a nih thu a sawi bawk. SCERT hnuaiah ISRO leh MIRSAC tangkawpa din, Edu-Sat kalpui mek niin satellite kaltlanga inzirtirna pek a nih avangin thingtlang kilkhawr zawk amite tan la tangkai hle tur thil a nih thu a sawi a ni. Minister Pu H. Rohluna chuan zirna in hma a sawn dawn chuan zirtirtute thiamna leh inpekna a pawimawh hmasak ber thu sawiin, chumi avang chuan zirtirtute training tha pek chu state sawrkarin a ngaihpawimawh thu a sawi a. Vawiina DIET building thar hawn tak pawh chuan zirtirtute chherchhuah kawnga hmalakna tangkai a nih ngei a beisei thu a sawi.

Vawiin Serchhip DIET Institutional Building hawnna inkhawm hi Pi Esther Lalruatkimi, School Education Commissioner & Secretary chuan a kaihruai a. Serchhip DIET Principal Pu Lalrammawia chuan DIET chungchang report a pe a. Pu Lalruatkima, SE, PWD, Project Circle Aizawl hnen atangin DIET Institutional Building sak dan chungchang  ngaihthlak a ni. SCERT Director Pi Laldawngliani Chawngthu chuan lawmthu sawiin a khar a ni. Building thar hawnna inkhawmah hian Serchhip DC Pi Sangchin Chinzah, SP Pu R. Sathiyasundaram, School Education Department hotute leh district department office hrang hranga a hotute an tel bawk a ni.

Vawiina hawn tak Serchhip DIET Institutional Building hi CSS atanga sum hmuh hmangin 12.6.2015 khan sak tan a ni a. 10.11.2016 khan zawh a ni. Building hi chhawng thum a sak niin, chhawng tin zau zawng belhkhawm chu metre 758 bial a ni. Ground Floor ah Classroom pahnih, Library, Resource Room leh toilet a awm a. First Floor ah Principal Room, Staff Room, Waiting Room, Teacher's Lounge, Toilet leh Store Room awmin, Second Floor ah chuan Assembly Hall, Store Room leh Toilet dah a ni. 

DIET Serchhip hi sawrkar laipuia Ministry of Human Resource Development in  kaihhruaina a siam - elementary school zirtirtu 2500 awm tlinlohna ah chuan zirtirtute training na tur Mini-DIET din a phal angin Sept ni 5, 2003 khan din tan a ni a. April ni 22, 2016 khan Serchhip DIET chu hawn niin, 2013 ah MHRD meeting phalna in DIET puitling a hlankai leh a ni. Kum 2016 July khan Pre-service D.El.Ed kalpui tan a ni a, tunah hian he hmun atang hian In-service leh pre-service +regular) zir zo tawh chu an vaiin mi 171 an nih bakah IGNOU study centre anih angin in-service teacher IGNOU hnuaia DIET Serchhip kaltlanga zirchhuak tawh mi 180 an awm bawk. Zirlai 65 an awm mek a, anni bakah hian NIOS kaltlangin private school-a zirtirtu thawk lai mi 160 in Serchhip DIET-ah hian an zir mek bawk. Thawktu hi a vaiin mi 34 an ni a. Teaching faculty ah Principal 1, Lecturer 19 leh computer zirtirtu khawihtu 1 awmin, support staff 13 an awm bawk. DIET Serchhip hi NIELIT Study Centre leh district exam centre a ni a. Sawrkar hna thawk tura minimum computer qualification nei tura a beisei computer thiamna inzirtir thin a ni bawk. District Resource Centre-ah Tata Trust sum bultumin zirlaite tana tangkai tur lehkhabu leh bungrua chi hrang hrang dah a ni bawk. ICT bultumin Mobile Phone hmanga class test subject hrang hranga neih theihna te kalpui thuai tum a ni bawk.