Vawiin khan Pu John Rotluangliana, Minister, FCS&CA, Transport, Tourism, Mamit bialtu MLA ni bawk chuan a bial chhung Dampui khua-a Community Hall sak thar chu a hawng.

Hawnna inkhawmah thusawiin Pu John Rotluangliana chuan khawtlang hruaitute'n hetiang Hall tha tak anmahni ngeia an sa chu lawmawm a tih thu a sawi a. MLA Fund hmanga Hall tha ber pawl sak a ni chu lawmawm a tih thu sawiin Dampui khawtlang leh VC-te thawhrimna chu vawiinah kan lawm ta a ni a ti.

 Dampui khua chu zokhaw nuam tak, thing leh mau tamna, mihring hriselna atan pawha boruak tha tak nei a ni a. Tun hma-a tui chungchanga inharsatna thin pawh Sorkar hmalaknain sutkian tawh niin in-choka maiah tui inherhhaw thei ta hi hmasawnna ropui tak a ni a. Chuvang chuan National Highway kawng tharin a pawh lo tur chu pawi ti lo tur leh kawng thar lama insawnthla kher lo turin Dampui mipuite a chah bawk. Phaileng leh Dampui kawng Rural Department hnuaia laih lo ni tawh chu District Headquarter awlsam zawka in dawr zung zung  theihna turin a rang lama siamthata tharthawh vat a nih dawn thu a sawi bawk.

Kan Sorkar chu hmathlir tha tak nena kalzel a nih thu sawiin infiam mite tan hmun hrang hrangah Grass phah tawh niin Mamit GSA Field erawh Grass phah a nih loh nachhan chu Multipurpose Field atana hman thin a nih vang a ni a ti a. Zirna kawngah pawh hmasawnna tam tak hmuh zel niin tun hnai lawkah pawh MiMER Medical College hawn thar a ni chu Mizoram mipuite tana ro tling a nih thu a sawi. Mizoram State chu India ram State zawng zawngah a ram chhung khaw hrang hrangte chu rualkhai taka a than thu sawiin kan ngaihtuahna te chu fim taka hmang thin turin leh kan Kristiannain a kentel faina leh thianghlimna vawngnung zel turin kalkhawmte a chah bawk a ni. Mamit District chhunga hmun hrang hrangah Eco- Tourism Park siam mek a nih thu sawiin hengte hi tha taka enkawla mikhualte lo dawnsawn kawngah hawihhawmna kan neih a ngai a ni a ti.

Vawiina Dampui Community Hall hawn thar hi MLA Fund Rs 25,00,000/- (Cheng Nuai Sawmhnih leh Panga) senga sak niin khawtlang mipuite hman turin Minister hian Badminton Racket, Cock, Badminton Net, Volleyball leh Volleyball Net te a pe a ni.

Community Hall hawnna inkhawm hi Pu Zodinsanga, Dampui VCP-in kaihruaiin Hall thar lawm nan hian khawtlang ruai buatsaih a ni.

Attachment

  • Loading attachment...