Vawiin khan Chief Minister Pu Lal Thanhawla’n  District Level Agriculture & Allied Sector Exhibition Serchhp Field No 2 ah a hawng.
Chief Minister chuan Agriculture leh a kaihhnawih department hi ram thang zelah a pawimawh tawlh tawlh dawn a. Chuvangin kut hnathawh hi hna zahawm ber a ni tih kan hre thar zel dawn a ni a ti. Exhibition neih hi thil siam chhuah leh tharchhuah te mipui hmuh atana pholan ringawt a ni lova, heng thil pholan atangte hian engtin nge tangkaina kan hmuh theih ang tih lam hawi zawnga buatsaih a nih thin thu Pu Hawla chuan a sawi a. Tun hmaa mi tih tawh kan lo chin chhawn thin thu leh mi min tih hmuh thin avanga ti ve kan nih thin kha kalsana mahni irawm chhuak ngei atanga hma kan lak a tul tawh a ni a ti. Organic Framing te, changpat hmanga leitha siam te sorkar chuan uar chhoh deuh deuh a tum dawn tih a sawilang a, hetiang exhibition hi district dangah pawh chhunzawm zela mi thatchhe deuh te fuihharhtu tangkai tak a nih zel a beisei thu a sawi bawk. Chief Minister chuan tangkai tak leh India leh khawvel hmun dang pawha hralhchhuah theih khawp mau sawngbawl dan min zirtir turin leh ram thlithlai turin Taiwan atanga mi thiamte an lo kal tur thu a sawilang bawk a ni.

NLUP chungchangah a dawngturten ar leh vawk vulh thlang an tam thu sawilangin uluk taka sorkar-in kalpui a tum avangin tuna pawisa ruahman sa pawh hi la khawih chet loh an rel thu a sawi a. Ar emaw vawk emaw vulh thlangtuten an tuchhuan thlenga eizawnnan an hman theih nan  20/30 chauh vulh lovin  farm lian tak din a tul zawk tur thu a sawilang bawk a ni.  

Agriculture  Allied District Level Exhibition hi Agriculture Technology Management Agency (ATMA) Scheme hnuai atanga buatsaih a ni a. Agri. leh a kaihhnawih department dang, Horticulture, AH & Vety, Soil & Water Conservation, KVK leh Fisheries ten lo neitute hnena training an pekna scheme a ni a. He exhibition ah hian an ni bakah DRDA, Assam Rifles, MIFCO, Thenzawl Handloon & Handicrafts Association leh Flower Show entir a ni a. Heng bakah hian Aizawl atangin Hnamchhantu, LRZ leh RTF Enterprise ten an thil zawrh laite an pholang bawk a ni.

Exhibition a inkhawm neih hi Serchhip D.C. Pu H. Darzikan a kaihruai a, Chief Minister hi a nupui Pi Lal Riliani bakah Pu K.S. Thanga, Parliamentary Secretary leh Pu K. Lianzuala, Chairman, KVIC Board ten an tawiawm a ni. Naktukah a bialchhunga khua Neihloh leh Buangpui te a tlawh ang a. A tuk leh Zirtawpni ah Agri Exhibition a lawmman la te hnenah lawmman a sem bawk ang.