4894/2024-2025

Serchhip, the 29th March 2025: Vawiin khan Serchhip District Headquarters Mizoram Upa Pawl General Assembly vawi 14 na, Sub Headquarters YMA Conf. Hall ah neih a ni a. Bialtu MLA, Pu Lalduhoma, Chief Minister chuan khuallian niin a hmanpui.

Chief Minister chuan, ramah kum upa an tam a, mihring dam rei an tam chuan, chu ram chu ram tha leh changkang tihna tluk a ni. Ram changkang leh changkang lo tehna pawimawh tak pakhat pawh Life Expectancy at Birth a ni. Human Development Index tehna hrui pawimawh tak a ni nghal bawk.

Pathian zawng tlattute chunga a malsawmna, Biblea kan hmuh pakhat chu, "Kum tling takin i thlan i thleng ang a, a huntea buhphal tel khawm tak ang mai hian” tih a ni. Ruihhlo leh thil dang vanga thalai boral an tam em em lai a, MUP member ni thei khawpa damrei in ni hi in vannei em em a ni.

Upa te thil neih hlu em em mai chu an tawnhriat (experience) hi a ni. Kan pi leh pute pawh khan kum upa zawkte tawnhriat hi an ngaihlu a, engkimah upa zawk te an ngaichang hmasa zel thin. Chuvang chu a ni ang, Val Upa tih tawngkam te, Lal Upa tih tawngkam te hi kan neih phah ni.

Vawiina kan MUP member-te pawh hi in awmna hmun theuhah thangtharte zirtirtu in ni vek a, chhungkua leh khawtlang tan mi tangkai tak in ni vek a ni.

Kan sawrkar ve leh khan Old Age pension kan tihpun tur thu kan puang a, state in a tum ve lam kan tisang ta dawrh mai a, category tinah Rs. 1000 theuh kan pe ta a, central tanpuina nen chuan Rs. 1200 vel an dawng ta a ni. Chu chuan kum lama upa zawk te sawrkarin a ngaihthah lohzia a tichiang awm e, a ti a. Hrisel taka awm a, rei tak dam turin duhsakna a hlan a ni.

MUP Serchhip District Headquarters hnuaiah hian Branch 66 awmin Area 10 ah an inthendarh a, an vaiin member 6202 an ni a, an zinga 2842 hi mipa niin a dang 3360 hi hmeichhia an ni a, kum 80 chunglam hi 876 an awm. An zinga atangin Chief Patron 6, Patron 51, Life Member 303 an awm. Chairman kaihhruaiin Assembly leh Assembly inkara an member thite sunna an nei a, mipa 134 leh hmeichhia 154, an vaiin 288 an sun a ni.

Assembly hawnna inkhawm hi Pu T. Lalrawngbawla, President in a kaihruai a, Upa R. Vanlallawman hunserh hmangin, Pu CL Ramngaia, Vice President chuan lawmthu sawiin inkhawm a khar a ni.