Vawiin hian Chief Minister Pu Lal Thanhawla chuan, Serchhip Chanmary Veng; Tarpi tlanga Rs. 148.55 senga sak District Panchayati Resource Centre Building thar a hawng.

A hawnna inkhawm he Building thar Auditorium a buatsaihah Pu Lal Thanhawla chuan, India rama Panchayati Raj Institution kalpui tan a nih dawn lai khan Prime Minister te nen kan meeting fova, Mizoram in mipuite thlan chhuah ngei Village Council tha taka kan lo kalpui tawh avangin Village Council kalphung hi kan hmang tlang ta zawk a ni. Panchayati Raj Institution in ruahmanna tha tak tak a siamte chu kan senglut zel thung, a ti a.  Khaw tin ten mahnia ro inrelna tha leh rintlak (Local Self Government) kan neih theih nan duh taka kan thlan kan Village Council member te training tha zawk kan pek a ngai a. Tin, dan thar te a lo pianga, ruahmanna kalpui dan thar a lo chhuak a, thil thar a lo piang zel a, chung ang zawng zawngte hrethiam a, khawvel changkang zel man thiam chunga khawtlang an kaihhruai theih nan he Centre hi a tul hle a ni, a ti a. District danga an hawn tawh te pawh mipuiten an hmang tangkai hle nia a hriat thu sawiin, Serchhip District chhunga Village Council member zawng zawngte chu he hmun thar hi an inzirna hmun pui, hnathawk tlaka an intuaihriamna hmun pawimawh a nihzia hriaa tangkai taka lo hmang turin a chah a. Mikhual 30 zet thlen theih nghalna a neih lehzel avangin a hlu hle a, duat tak leh thianghlim takin lo enkawl tlat ang che u, a ti bawk. Hengte bakah hian Pu Lal Thanhawla hian, Mizorama remna leh muanna lo awm chhoh dan te, remna kan hmuh hnua Mizoram mipuite dinhmun harsat chhoh dan te, chung mi harsa zawkte khaichhuah nana sawrkarin Rangva a sem thin dan te, NLUP a lo kalpui tawh thin dan te, tun hnua NLUP leh NEDP sawrkarin a kalpui chhoh dan leh Mizoramin hma kan sawn pui ziate a tarlang bawk a ni.

District Panchayati Resource Centre hawnna inkhawm hi Pi Maria CT Zuali, Director, SIRD & PR in kaihhruaiin Er. C. Lalthlansanga, Core Faculty (RE) in Technical Report a pe a. He Building thar hi a chhuat zau zawng 400 square metres niin; ni 1.10.2016 a sak tan a ni a, ni 19.1.2018 ah sa zovin, Rs. 148.55 Lakh sen a ni. Building ah hian Conference hall mi 40 lenna pakhat leh Auditorium mi 80 len theihna pakhat a awm a, Library pakhat leh mikhual riahna tur room 15 awmin room pakhatah mi 2 zel riah theih a ni. A satu hi First Class Contractor Pu PC Vanlalsawma, Serchhip a ni. Tunah hian thawktu pathumin an thutchilh mek bawk a ni.

Chief Minister in Panchayati Resource Centre a hawnna hi Serchhip Addl. DC Pu Chuauhnuna leh District Officer hrang hrangte, chanchinbumite leh sawm bik mi thahnem takin an hmanpui a ni.