Vawiin chawhma khan Aijal Club Auditorium-ah hriselna chungchanga zirtirna State Level Workshop on Poshan Maah hman a ni a. Social Welfare Minister Pu P.C.Lalthanliana chu Khuallian a ni.
Khuallian chuan thu sawiin Social Welfare Department hnuaia Integrated Child Development Services (ICDS) chuan kumtin September Ni 1-7 hian ‘Nutrition Week’ an huaihawt thin a, tunkumah chuan September thla chhungin ‘Nutrition Month’ hman a ni dawn a ni, a ti a. National Family Health Survey report in a tarlan angin India ram naupangte zingah san dan tur anga sanglo an hmuchhuak nasa hle a, chaw tha tlakchham vang niin nausen lai atangin chaw pek that a pawimawh hle a ni, a ti a. March Ni 8, 2018 atang khan India ramah National Nutrition Mission ‘Poshan Abhiyan’ hman tan a ni a, Mizoram chhunga district pahnih Lawngtlai leh Siaha-ah mission hi kalpui tan a ni tawh a ni, a ti a. Kum 2019-ah chuan district zawng zawng tuam vek tum a ni, tiin mission hian naupang leh nu naupaite bakah naupawmte hriselna tihhmasawn a tum ber a ni, a ti. Kalkhawmte chu Mizoram chhunga nu leh naupangte hriselna chawikang tura fuihin department hrang hrang ten thawhhona tha tak nei turin duhsakna a hlan nghal a ni.
National Nutrition Mission ‘Poshan Abhiyaan’ thil tum langsar zualte chu: Community based Education-Anganwadi Centre tinah khawtlang mipuite zirtirna pek a ni a, thupui 21 awmin CDPO hnenah semchhuah tawh a ni; Village Health & Nutrition Day thla tina neih; Naupang san tur anga sang lo tuna 38.4% atang hian 25% a tih hniam tum; tui thianghlim in tur neih te, hriselna dinhmun enfiah te an ni. Mission hi kum 2022 thleng awh tur a ni.
Social Welfare Secretary Pi K. Vanlalrawni chuan programme hi a kaihruai a. Social Welfare Director Pi Laldikkimi chuan workshop chungchang sawizauna a nei a. PHE Department chuan tui thianghlim pawimawhna presentation hmangin an tarlang a. H&FW chuan ‘Anaemia and its intervention’ tih thupui hmangin presentation an pe bawk. Chawhnu lamah hian MzSRLM, Maternal & Child Health, Health & Wellness, CBE-Jan Andolan leh thupui dangte hmangin sawihona neih a ni. He hunah hian Social Welfare Department, PHE Department, H & FW Department an tel a ni.
