Chief Minister Pu Lal Thanhawla chuan vawiin khan Serchhip Hmar Veng YMA Hall-ah an Branch YMA Golden Jubilee (1968-2018) lawmna inkhawm chu khuallian niin a hmanpui.

Chief Minister Pu Lal Thanhawla chuan Serchhip Hmar Veng Branch YMA in an din kum sawmnga na an hmang thei chu a lawmpui thu a sawi a. YMA chu India ram pum a tlawmngai pawl hrang hrang zingah pawh a thawk tha pawl, Zo ze mawi chhawm nun kawngah te, khawtlang nun siamthatna leh hmasawnna kawnga mipui zirtirnaah te leh nungcha humhalh kawngah te hma an lak that thu sawiin, ram changkanna kawngah an thawh hlawk hle a ni, a ti. YMA chu sawrkar hmalakna hrang hrangah tawiawmtu tha an nih thin thu a sawi a. Ramin hma a sawn zel dawn chuan a chhunga chengte an tanrual a, dikna nen ke an pen ho a tul a ni, a ti a. Mizoram phei chu ringtu ram a nih avangin khawvel sakhaw lian ber ber pathum ten an hual beh ram ni mahse ringtu kan nihna kan nunah kan lantir a, entawntlak leh fiah tlak a kan nun a pawimawh hle a ni, a ti a. Faina kawngah pawh hmalak zel na tur a awm thu sawiin Chief Minister chuan khaw fai nih tum a tan kan lak naah pawh a chhunga cheng te hian keimahni theuh kan invawn thianghlim a tul hmasa hle a ni, a ti.

Chief Minister chuan ram hmasawnna tura sawrkar hmalakna, a bik takin thalaite tan khawvel thar siam tura zirna lamah te, infiamna khawvelah leh skill development leh thiamna sang zawk an neih theih nan a hmasawnna ruhrel din a nih dan te a sawi a. Mizoram Youth Commission hnuaiah civil service coaching te pawn lam mithiam te nen thawhho a siam a nih te, eizawnna atana thiamna bik leh theihna tipung leh chher tur a inzirtirna capacity building te, sipai a lut an tam theih nan a sipaia lut duh te tan a coaching class hawn a nih thu te a sawi a. NEDP hnuaiah entrepeneurship tihhmasawnna kalpui in, thalaiten an chhawr tangkai chhoh zel thu a sawi. Chief Minister chuan mahni a rinawm leh taihmak bakah thuawih theihna neih pawimawh a tih thu sawi bawkin, sawrkar hnathawk tan post duh bik a neih theih loh a, hmasawn tum a hnathawh ve duhte tan thawh hreh a neih theih loh a ni, tiin kalkhawmte chu taihmakna leh rinawmna chhawm nung zel tura sawm in, chu chu kan ram leh hnam kan humhalh theihna kawng pawimawh tak a ni, a ti.

Serchhip Hmar Veng Branch YMA hi kum 1968 October ni 15 khan din a ni a, tun dinhmunah member 671 (mipa 367, hmeichhia 304) an awm a ni. Jubilee pual hian veng chhunga kum 80 tling chinte hnenah thilpek hlan niin, mi 13 hnenah jubilee pual thilpek hi hlan a ni a. Central YMA atangin hruaituten vawiin jubilee lawmna hi an hmanpui bawk a ni.