Vawiin chawhnu hian Chief Minister Pu Lal Thanhawla, bialtu MLA ni bawk chuan Serchhip Bazar venga Serchhip Sub Headquarters Mizoram Upa Pawl Office building thar chu a hawng.

Thusawiin Pu Lal Thanhawla chuan, Upa Pawl ten Serchhip khawpui laili takah Office an nei chu a lawmpui thu sawiin tangkai taka an hman theih a duhsak a. Kum Upa lam nih hnu pawhin ram leh khawtlang, chhungkaw tanah thil tangkai tih theih tam tak a la awm a, chungte chu bansan mai lova chhunzawm zel turin a fuih a ni. Chief Minister chuan, kum tam hi malsawmna a ni a Upa pawl member te chu chu malsawmna dawngtute chu an ni, a ti a. Chutihlaiin damreina hi hlawhchhuah ngai ve bawk a nih avangin zuk leh hmuam, ruih theihthil leh taksa chaklohna thlen thei kawng tinrengah nun kan fimkhur a tula, ei leh inah pawh kan fimkhur a ngai hle a ni, a ti.

MUP Sub Headquarters Office hawnna inkhawm hi President Pu CL Ramngaia,n a kaihruaia, Treasurer Pu CR Tuhranga,n Technical report a pe thung. Report a a lan danin Office hi a dung feet 30 leh avang feet 13 a zau a ni a, MUP member te thawhkhawm Rs 147,619 leh Chief Minister in MLA Fund Rs 100,000 a pek hmanga sak a ni.

Chief Minister in UPA pawl Office a hawnna hi Tourism Minister Pu John Rotluangliana leh Parliamentary Secretary Pu T.T Zothansanga te bakah Serchhip Bawrhsap Dr. Lalrozama IAS leh Officer pawimawh thahnem takin an tawiawm a ni.