Vawiin khan NLUP Implementing Board (NIB) Vice Chairman Pu PL Thanga hovin pa (mushroom) zirchian dan tur chungchang NLUP Conference Hall ah sawiho a ni.

Mizoramah pa ei mi leh ei sual theih, pa khawi leh ram pa chi hrang tam tak a awm a. Ramhnuai atanga pa lak, ei sual avanga thi Mizoram chhung hmun hrang hrangah an awm avangin pa ei mi leh mi loh thliar hranna atana zirbingna kalpui chu thil tul tak a lo ni ta a. NLUP bultumin Mizoram sawrkar, Mizoram University leh University of Minessota thawhhona chhawr tangkaiin Mizoram University chuan pa eimi zirbingna nei turin University of Minessota ah MZU Dept. of Environmental Science-a Asst Prof. Dr John Zothanzama a tir a. Ani hian hmalak dan tur rawtna a siam chu NIB ah thehlutin bul tan a lo ni ta a ni.

NIB Vice Chairman Pu PL Thanga chuan RD Minister Pu R.Lalzirliana hova meeting neiin Mizoram hmun hrang hranga Block Development Officer (BDO)-te ko khawma meeting neih pui an rel dan a tarlang a. Zir chian tura pa lakkhawm leh pa ei mi leh mi loh thliar hran theih a nih hnua mipui hrilhhriatna kawngah BDO te an tangkai hle dawn a ni, a ti. Kumin fur chhung ngeia pa hi lakkhawm a, uluk taka zir chian a nih hnuah an thil hmuhchhuahte chu kum thar fur hma ngeia mipui hnena puanzar chu an tum dan a nih thu a tarlang bawk.

Meeting-ah hian pa hi engtia lakkhawm tur nge tih leh, him dam taka zirchian zui tlaka thawn dan tur an ngaihtuah a. Pa hi uluk taka Mizoram University laboratory ah zirchian a nih hnuin University of Minessota ah laboratory changtlung zawka zirbingna neih leh turin thawn thlak a ni ang a. Pa ei mi leh tur nei chi thliar hran theih a nih chuan pa eisual avanga thi an awm tawh loh mai bakah eizawnna atana hmangtu ten thlamuang takin an hralh chhunzawm theih beisei a ni.

Meeting ah hian Mizoram hmun hrang hranga BDO te leh an awiawhte an tel a ni.