Chief Minister Pu Lal Thanhawla chuan vawiin khan New Serchhip YMA Hall-ah Serchhip Mizoram Hmeichhe Insuihkhawm Pawl (MHIP) Sub-Headquarters Conference vawi 9-na chu khuallian niin hun a hmanpui. MHIP Patron Pi Lal Riliani'n khuallian hi a tawiawm a ni.

Chief Minister chuan chhungkua leh khawtlang nun a nu te dinhmun a pawimawhna leh khawvel inkaihhruaina kalphunga nu te an ropui zia a sawi a. Nu te chu ram nghahfak thalaite chherchhuaktu an nih avangin ram hmasawnna atan an pawimawh hle a ni, a ti. Chief Minister chuan tehfung hrang hrang hmanga economy hmasawn dan chhuichianga NITI Aayog report leh report dang danga a lan danah Mizoramin ei leh bar a hma a sawn nasat thu tarlangin, thahnemngai leh rinawm taka mahni hna theuhva kan hma zawn ami kan thawh vek chuan tun aia chak zawka thang in dinhmun tha zawk kan la luah thei a ni, a ti a. Chutihrual chuan nun uluk leh rilru puthmang dik put te, nunphung hrisel leh ei leh in, zuk leh hmuam a fimkhur tel a tul thu sawiin, chhungkaw nu te chu hemi atana an pawimawh thu leh, mahni chhungkua theuh a bultan chuan khawtlang leh ram huapin rah tha a chhuah theih thu te Chief Minister chuan a sawi a ni.

Vawiin MHIP Sub-Hqrs Serchhip Conference hi an President Pi Sanghmingliani kaihruaiin, he inkhawma khualzahawm Pi Saipuii, MHIP General Hqrs. President chuan Conference Thupui "Hmeichhia leh naupangte himna leh hmasawnna tura nasa taka tan lak" behchhan in thu a sawi bawk. Conference hmanpui tur hian MHIP Headquarters bakah Lunglei Sub-Headquarters atangin palai an kal a ni.