Mizoram RMSA Employee Welfare Association (MIREWA) General Conference vawi 4-na chu vawiin khan Synod Conference Centre, Mission Veng, Aizawl-ah neih a ni a, he hun hi Khuallian School Education Minister Pu H.Rohluana’n a hmanpui.

MIREWA General Conference hawnna inkhawm MIREWA President Pu R.Lalnunhlima kaihhruaiah Khuallian Pu H.Rohluna chuan RMSA hnuaia zirtirtu leh hnathawk dangten zirna lamah an thahnemngaihna chu a lawmawm hle a; a theih chin chinah anmahni hamthatna awm thei dan tur angin sorkar pawhin hma lak zel a duh a ni, a ti. Zirna hi a pawimawh em avangin sorkar chuan a thathei ang berin kalpui a tum zel a, zirtirtu mahni post-a awm tha duh lote pawh hrem a, ban mekte pawh an awm a ni, a ti bawk. Rampum huapa zirna kalpui dan her danglam tumin sorkar laipui chuan RMSA, SSA leh Teacher’s Education (TE) te chu hmun khatah khungin ‘Samagra Shiksha Abhiyan’ tiin a vuah a, hei hian engemaw chen chu zirna kalphung leh inrelbawl danah nghawng a neih rin a ni, a ti. Tun hnaia Science leh maths teachers posts engemawzat state sorkar hnuaiah lakah RMSA zirtirtu thenkhatten regukar post duhin an chhuahsan a, chung ho chhuahsan post-te hnawhkhahna tur pawh ngaihtuah mek a ni tiin Minister chuan eng angah pawh thawk ila zirtirtute chu an mawhphurhna an hlenchhuah hi an rawngbawlna pui ber a ni tih hre reng turin a chah a, inpekna thar nen kumin school session tharah thawk turin zirtirtu zawng zawnte a chah a ni.

MIREWA General Conference hawnnaah hian MIREWA Secretary Pu Lalthakima Colney Report ngaihthlak a ni a; MIREWA Adviser Pu Lalrammawia, Govt Mizo Hogh School Headmaster leh MIREWA Vice President Pu Vanlalpeka ten thu an sawi bawk a ni.

Secretary Report-in a tarlan dan chuan kum 2016-2018 chhunga MIREWA dinhmun leh hmalaknate chu a hnuaia mi ang hi a ni :

RMSA School awm zat : 92

RMSA hnuaia thawktu awm zat : 742 (RMSA hnuaia hlawh la) - Zirtirtu 598, MIS 9, Special Educator 45, LDC 10, 4th Grade 10 bakah vacant post hrang hrang belhkhawm 69 a awm mek.

MIREWA Member zat : 515 (226 member la ni lo) - RMSA Welfare Association a nih angin, zirtirtu leh school-a thawkte chauh ni lovin RMSA hnuaia hlawh la zawng zawng member an thei a ni.

RMSA leh Adhoc School inbawhthuah/school khata awm thin te chu tihhran a ni a, RMSA school thawktute a hrangin an awm tawh.

RMSA school-a thawk tura lak ni si, hmun danga pawhpen leh attached an awm avanga thawktu indaihlohna an tawk a, chungte chu an post dik taka an kir leh theih nanhmalak a ni bawk.

Vawiin chawhnu vek khan MIREWA hruaitu inthlanna neih nghal a ni bawk.