2236/2024-2025

Dated Serchhip, the 26th September, 2024: Vawiin khan Serchhip Teachers' Association (STA) te chuan Serchhip Auditorium-ah General Assembly leh an Golden Jubilee lawm kharna te, MLA Trophy (Inter School Challenge) lawmman semna te an buatsaih a. Chief Minister Pu Lalduhoma chuan he hun hi a hmanpui.

Thu a sawinaah Chief Minister chuan, UT sawrkar kan han neih khan sawrkar hna a pung a, lehkhathiam kan la tam lutuk loh bawk avangin sawrkarah khan kan lut zung zung mai a. Hun a lokal chhova sawrkar hnaruak pung zel aiin lehkhathiam pung zel kha kan lo chak zawk thuai a, sawrkar hnaa luh a har ta tial tial a, tunah phei chuan a harsa tawh hle a ni. Mizoram sawrkarah hna ruak hi tlem mahse India sawrkarah erawh chuan luh theihna a la tam reng thung a. Kan thiamnain a tlin phawt chuan SSC te, Railway Recruitment Board te, IBPS lamah te hna a la tam hle. Hei rel kawng a rawn tlang tawh a, an service tan tep tawh a. Kan rail station enkawltu tur Mizo thalai Railway Officer leh staff tam tak kan mamawh dawn. MRB Manager tur Mizo thalai pawh hi kan mamawh tam hle. Mahse IBPS exam paltlang thei kan nei mang tlat lo. Heng kan harsatna tawh mekte hi zirtirtuten chonaa ngaiin thalai tha zawk, taima zawk leh tumruh zawk min chherchhuahsak lo tum ang che u. Heng exama tling tawhte hian kan zirna system te, kan syllabus te an dem ngai lo. Tih tak takna nena beitu an tlem lutuk hi an mang tiangtu zawk a ni, a ti.

Chief Minister chuan, heng central subordinate staff leh banking exam hrang hranga Mizo thalaite an tling hlei thei lo hi kan zirtirtuten chonaa ngaiin, tling zo ngei tura buatsaihna lamah tan lo la turin ka sawm che u a ni, a ti.

Sawrkarin mahnia eizawnna tur din lama theihna neite tana hmalakna tur Handholding Scheme hnuaia a awm tur thu te, sports lama talent nei thate dap chhuah leh chung naupangte tanpui zui zel a tul thute a tarlang bawk.

STA hian Serchhip mipuite tan hna tha tak tak a thawk tawh thin a. India rama ziak leh chhiar thiam tamna ber district kan nih theihna chhan pawh hi zirtirtute thawhrimna vang a ni. Zirtirtu hna hi hna zahawm, Pathian rawngbawlna hna leh midangte tanpuina hmun tha a ni a. Kan ram hian hma lam kan pan zel theih nan thangthar tha zawk kan din a ngai a. Zirtirna tha pek an ngai tihna a ni. Chu chu rilrua vawng chungin theihtawp i chhuah zel ang u, tiin a sawm a ni.

Chief Minister hian Golden Jubilee Souvenir a tlangzarh a, MLA Trophy (Inter School Challenge) lawmman dawngtute hnenah lawmman a hlan bawk. He inelna hi school naupangte an zirlai behchhana an inelna a ni.

Inkhawm hi Pu VL Chanchinthahrilmawia, President, STA in a kaihruai a, Pi C. Krosthangi'n hunserh a hmang a, Pu Vanlalvuana chuan lawmthu sawiin hun a khar a ni. Chawhnu lamah hruaitu thlanna an nei leh bawk.